Xeira califica de «discriminación» pal gallego-asturianu la propuesta d'oficialidá del Principáu

L'asociación Xeira calificó de «marxinación» y «discriminación» pal gallego-asturianu la propuesta d'oficialidá fecha pol Gobiernu al restu de grupos parllamentarios. Nesta, l'idioma del Navia-Eo pasaría de ser llegalmente gallego-asturianu a eo-naviegu y namás sería oficial nel so «ámbitu territorial esclusivu».

Énte esto, Xeira reclamó al traviés de nota de prensa a los partíos políticos y, especialmente, a los socialistes del occidente defender «la igualdá de les dos llingües propies d'Asturies» nes negociaciones de la reforma estatutaria.

Según l'asociación, la propuesta del Principáu supón «la vía de la minorización y l'ocultamientu» pa la realidá llingüística del Navia-Eo y choca coles propuestes del movimientu de reivindicación de la zona.

«Nun se trata de que rotulen en gallegu-asturianu'l centru médicu de Cangues d'Onís, ye reconocer nel Estatutu la oficialidá de les dos llingües d'Asturies y que depués una llei de normalización llinde los ámbitos territoriales d'usu», esplicaron, p'añadir que «diba ser una ironía que'l cambiu d'actitú de la FSA cola cuestión llingüística tuviera como resultáu collateral minusvalorar nel Estatutu los derechos de los falantes del gallego-asturianu», sentenciaron; informó Europa Press.

---

---