Baxando a Santu Adrianu

OPINIÓN

21 may 2016 . Actualizado a las 05:00 h.

Dende lo alto Cuallagar pervése Yernes que yá apruciere na documentación asturiana de magar el sieglu IX. Si xubís dende Grau atoparéis un pueblu guapu y llimpiu y cuasimente llanu. Dende?l puertu nun se destremen menudencies pero la panorámica llevanta l?ánimu ya faite alendar. El nome del pueblu ye importante porque podría ser testimoniu del cultu a Aerno, un dios prerromanu que tamién veneraben los ástures zoeles, aquéllos del cabu?l país, al sur, averaos al Duero. El vieyu país de los ástures, l?Asturies indíxena, entá caltién raigaños de gran fondura. Non too se pieslla con Roma. Otra tapecida realidá álzase con más lluz tolos díes y fainos festexar los llugares que se llamen El Táranu, L.luguéi o Yernes testigos llingüísticos de gran fondura y que?l silenciu nun debiere sapozar.

Sigamos alantre mirando al Norte, al empar del cordal que dixebra de Grau y va per tierres de Proaza. Llegaremos a Llinares y diremos amiyando mentanto entramos en Santu Adrianu, llaráu de referencies culturales y étniques de gran fustax. Habrá que dexalo pa otra vez. Tamién les cases y casones. Mesmamente los osos que nun son a dar esbardos, ellí empallonaos nun sueñu procreador etenru. Averémonos, ensin más, a La Venta, güei fácil de reconocer. Llueu tiremos a Villanueva y Tuñón. Paremos a ver la ilesia pa tastar el bon arte del país ellí testimoniáu, dende lo cabero?l sieglu IX, pela obra del rei d?Asturies, el gran Alfonsu III.

Faigamos un esfuerzu. Apolacemos la mente y el pensamientu. Quédanos una cuesta pindia pero enantes aguardemos por si daquién s?avera a nós pela carretera que güei avanza dende Trubia pasando per San Andrés, Peñoba y Peña Escalera. Pudiere ser que d?ellí viniere xente que dexare atrás Guanga na llende alta con Sama Grau. Guanga podría llevar el nome visigodu Wamba. Ye posible. Pero lo cierto ye que, baxando de Guanga atoparéis un sitiu que llamen, con curtia imaxinación poética, La Pata la Mula. Ellí la mula que carretaba a la Virxen camín d?Exiptu dio una patada al lladrón que-y saliere al pasu. Quedó recuerdu d?ello nun cuetu de la senda onde entá s?amuesa güei la pata fecha muezca na piedra.