Pedagoxía institucional

OPINIÓN

10 jul 2016 . Actualizado a las 05:00 h.

Xixón nun ye ciudá de certeces. Debe ser por esi calter ente bálticu y soviéticu que diz el mio amigu Vicente Duque. Yo, que soi más d'andar per casa, acháco-ylo al esmantelamientu industrial. Pero'l resultáu ye ún solu y el mesmu: les urxencies sociales rara vez pasen pela axenda política local, y cuando lo faen ye d'un xeitu más voluntariosu que sistemáticu. Xixón ye ciudá d'espontaneidaes, y gasta un apegu pola improvisación que concasa mal col so tamañu y cola so complexidá social. Seique yera más fácil nortiar en Xixón cuando les rentes del trabayu yeren más altes, pero aquel escenariu de fabricones y astilleros yá nun ye onde vivimos últimamente, y ye comprensible que tanto les bones voluntaes como les otres tarden un poco n'adaptase a los nuevos suxetos en conflictu. Mentanto, el branu sigue siendo gris y borrinosu los más de los díes, Foro sigue gobernando, los más de los díes, y les despidíes de solteru siguen avergonzando a gran parte de la ciudá, polo menos a esa parte na que me cuento.

Podíemos vivir ensin certeces guapamente, pero poques ciudaes llogren sobrevivir ensin consensos más o menos agresivos. Nun cuento qu'esa agresividá social seya más grande en Xixón que n'otres ciudaes, pero ye la que m'arrodia, y poro ye la que m'interesa y me sollivia. Pongamos por casu que comprendo a l'afición sportinguista y que nun la considero nin más nin menos lesiva qu'a cualquier otra afición de cualquier otru equipu de fútbol, pero llevo mal que nes escueles s'afale a los escolinos a vistir un día determináu colos colores del equipu. Rareces. Y eso que, como dixi, entiendo qu'una ciudá se les arregle pa coser banderes que cohesionen y apurran esi calor tribal que-yos da masa y sentíu. Pero cáfienme lo mesmo, eses banderes, incluso cuando son de les míes.

Nun va tantu tiempu que l'Ayuntamientu de Xixón canceló un conciertu d'Albert Pla por unes declaraciones del cantante que, polo visto, afectaron a la sensibilidá de la ciudá o cuando menos a la de les sos fuerces vives, ello ye, a la de los representantes del consensu. Paecióme una decisión estúpida, típica de mentalidaes reactives que cuenten castigar a un agresor ficticiu ensin que naide-yos pida que lo faigan. Esta selmana volvió a repetise esa situación por mor del cantante Francisco: cancelóse una actuación d'esti como represalia polos insultos que-y dedicó a Mónica Oltra. El mesmu error de la otra vez: que Francisco diga (y piense) imbecilidaes pue dar pie a calificalu d'imbécil (yo mesmu lo faigo ensin el menor remordimientu), pero nun cuento que lu contrataren poles sos opiniones, sinón por ofrecer un espectáculu que, hasta onde yo sé, sigue siendo igual de llamentable agora que cuando al programador de turnu se-y ocurrió incluilu na ufierta d'ociu de la ciudá. Ocúrrenseme polo menos dos motivos p'abandonar esi camín del castigu exemplar.

De mano, que la llende que separa a los que reciben esos castigos de los que nun los reciben ye bien difícil de percibir: toi seguru de qu'hai más d'un home o de dos capaz de pensar y de dicir esactamente lo mesmo que dixo'l cantante, y cola mesma convicción, y nun tengo mui claro si los representantes del consensu diben aplaudir col mesmu entusiasmu que se despidiera a un xardineru o se rescindiera un contratu con una constructora a causa de que'l xardineru o’l constructor s'espresaren como lo fixo'l tal Francisco Nun Sabemos Cómo S'Apellida.

El segundu motivu tien que ver con otra llende, nesti casu la que separa les opiniones oxetu d’escarmientu de les que se consideren correctes y hasta apropiaes pa esponer en público: toi d'alcuerdu en qu'hai que ser mui babayu pa nun-y dar importancia a lo que dixo esti señor, y que lo normal ye qu'unos insultos d'esi calibre tengan consecuencies, pero pue ser que, pa la próxima, condenemos a dalguién por opiniones menos dignes d'espreciu colectivu y nun podamos facer nada porque yá van dos veces que-yos concedimos a los representantes del consensu esa autoridá, la de regular lo que se considera apropiao y lo que non.

Nun brillen los representantes del consensu poles sos intelixencies preclares nin por una moralidá incuestionable. Lo primero nun tienen por qué lo facer, y lo segundo, solo nel ámbitu de les sos conductes propies, non como inquisidores o pedagogos de mayoríes. Yo, polo menos, yá tengo años abondo como p'alministrar yo solu les mios indignaciones.