Trabayadores de Normalización Llingüística piden la creación del serviciu n'Uviéu

Europa Press / La Voz UVIÉU

OVIEDO

«Non solo nun se creó esi serviciu, sinón que nun se tán desarrollando nengún tipu de midíes estudiaes pal conceyu», señalen dende l'Asociación

30 nov 2016 . Actualizado a las 19:08 h.

L'Asociación de Trabayadores de la Normalización Llingüística volvió pidir esti miércoles la creación d'un Serviciu de Normalización Llingüística nel Conceyu d'Uviéu. «Depués de diez meses, Uviéu sigue a la cola del procesu de recuperación llingüística. Non solo nun se creó esi serviciu, sinón que nun se tán desarrollando nengún tipu de midíes estudiaes pal conceyu», señalen. Asina, l'Asociación sigue «defendiendo que la creación del SNL daría forma planificada, con personal cualificao, a estes actuaciones que se tán faciendo a saltu mata».

«Eso sí, non de cualquier manera, por eso entendemos que'l procesu pa crear una plaza del SNL ha facese con toles garantíes que conlleva un procesu de selección públicu, ente otres, unes condiciones d'estabilidá y categoría llaboral acordies al puestu técnicu que precisa, encaxáu, amás, nun nivel altu nel organigrama del Conceyu. En resume, unes condiciones que garanticen la tresversalidá de las actuaciones más allá de la Conceyalía de Cultura», comenten los trabyadores de Normalización.

Recuerden amás que conceyos como L.lena o Corvera, cola diferencia poblacional o presupuestaria d'estos últimos cola capital d'Uviéu, yá tienen serviciu, «polo que problemes técnicos o presupuestarios nun pue haber, habrá que los buscar n'otros sitios».

Na opisnión de l'Asociación, «n'Uviéu la voluntá y la querencia por tener la cartera de política llingüística esmucióse y poco o nada se ve». «Nada se conoz de los planes del Conceyu pa recuperar la llingua asturiana n'Uvieo y eso a estes altures ye preocupante. Al final paez qu'hubo más gana por tener el control del asturianu que por ponese a trabayar p'acabar con una tradición de nun facer nada», comentó la organización.

Asina, recalquen en que «la planificación llingüística ye necesaria, y que precisa d'un presupuestu dignu pa desenvolver actuaciones que garanticen el principu d'un procesu de recuperación llingüística nel conceyu». «La llingua asturiana, amás, ha ser una cuestión tresversal, lo único que garantizaría l'éxitu de les actuaciones, polo que toles árees deberíen contemplar actuaciones normalizadores», acabó.