Caltenía Pachín de Melás, nos años finales d’una vida que diría esforoñase dafechu na cárcele del Cotu’l 6 de marzu de 1938, que l’olvidu yera una tupía talaraña qu’escuaxaringaría bien ceo tolo algamao, arrequexándolo nun solláu de pantasmales desidies; esi olvidu, dicía, “que tapa la vida luchadora de ansias, de inquietud”. L’eruditu Patricio Adúriz Pérez, en 1978, rescató eses llastimeres confesiones –premonitories hasta ciertu grau polo que-y tocaría– nuna monografía exemplar na que, primero que naide, fexo un repás concenciosu y documentáu (flor que nun se da muncho perequí) sobre la estatura lliteraria d’Emilio Robles Muñiz. Rexistra nella que Pachín de Melás consagró a la poesía “sus mejores afanes y entregó las más lozanas horas de su ingenio”, y afirma que la recatafila de títulos dramáticos estrenaos ( La sosiega, Secadiella, La Peñuca...) taben preñaos “de gracia y observación, y también de ternura”, asina como que nun perdieren puxu, porque, si se repusieren, amosaríen “una jugosidad tal -señala Adúriz- que (parecería) que acaban de ser entregados a la escena”.

Dende’l so puestu de cronista (que desendolcó ente’l 30 de xunetu de 1982 y’l día nel que falleció, el llunes 12 d’ochobre de 1992, tomando- yos el relevu a Xulio Somoza, Fabricio y Xoaquín Alonso Bonet) y bien qu’anantes como direutor de la Hemeroteca de Xixón, Adúriz desvivióse por llimpiar de yerros, tracamundios y tiñebles los recovecos del patrimoniu hestóricu que tenía que ver col pasáu llonxanu y cercanu del Principáu y de la so ciudá. Ta por facer entovía un repertoriu de la bayurosa collecha de temática asturianista que’l llabiegu d’Adúriz semó nel ámbitu inteleutual y popular p’allanar el conocimientu de los sos contemporáneos y de los que vinieren depués, un llabor espléndidu y metódicu, irrenunciable pa él, qu’acometió con aplicación espantando del so plan de trabayu la improvisación, los xuicios emprestaos y los moos xostrones que presenten dellos especialistes (sic).

La obra d’Adúriz compónse d’artículos, llibros y ensayos de calter investigador, pero nella tamién atopó sitiu pa la creación poética, estaya na que recibiera dellos premios. A Adúriz debémos-y la lletra de “Figurines de barro”, un afiláu villancicu de resonancies tradicionales que musicara, nos entamos de los 70, otru grande qu’hai yá diez años que falta, Antolín de la Fuente. Asina recriaba l’autor xixonés la perconocía escena del nacimientu: “Decímoslo nosotros / col nuestru son floríu / en villancicu pal fíu de Dios. / Figurines de barro / pa col felechu, / y un lluceru esguilando / camín del pechu. / La mula ye una d’elles, / algo tra’l güé. / La Virxen, José y el neñu, / les otres tres. / Tres que son tres les vertudes. / Los Reyes tamién son tres, / cuatro les pates del horrio, / les de la panera seis. / Un solu el cura del pueblu / y abasta con un portal, / pa un villancico faen falta / toos los neños del llugar. / ¡Ay que ye Nochegüena! / ¡Ay, que ye Navidá! / ¡Ay que lo diz el gallu / per la corrá! / Decímoslo nosotros / col nuestro son floríu / en villancicu pal fíu de Dios”. Nun sedrá l’únicu casu de versu bable pa interpretase cantáu, pos arriqueció partitures con testos como, por exemplu, La llechi del güen amor. L’envís relixosu de só quedara yá perafitáu n’estrofes marianes como esta qu’acoyó’l diariu Voluntad( collaboró, arriendes, en El Comercioo LA VOZ DE ASTURIAS) el sábadu 8 d’avientu de 1945: “A tus plantas llorando pesaroso / mil plegarias trenzara bienhadado / que tan sólo, Señora, a vuestro lado / mi pecho encontrara dulce reposo”.

La fras que sigue pertenez a una obrina teatral de Pachín de Melás pero roblaríala ensin problemes l’últimu cronista oficial que tuvo Xixón: “Asturias, te amé como pude, con cuanto amor pude albergar en mi alma” ¿Cómo-y retribuyeron a Patricio Adúriz les autoridaes rexonales l’asturianismu de quien tantu enfotu punxo por prestixar la cultura d’esti país na serie Viñetas asturianas? Lleven tres llustros pagándo-y cola moneda d’usu más corriente ente nós: indiferencia y silenciu. Pa chase a llorar y nun aparar, porque, recordémoslo, nel so funeral l’entós alcalde de Xixón, Álvarez Areces, declaró qu’Adúriz yera “una parte importante de la cultura de Gijón, un estudioso de la vida local y un profesional cuyo vacío será muy difícil de llenar”.