XIXÓN - Dempués de toa una vida dedicada a los llibros, llegó’l momentu de facer memoria. A los sos 47 años, y tres más de dos décades escribiendo, l’escritor tinetense Antón García espubliza La mirada aliella, una esbilla de los sos meyores poemes qu’edita l’Atenéu Obreru de Xixón, dientru la colección Tiempu de Cristal.

En pallabres del profesor de la Universidá d’Uviéu, Leopoldo Sánchez Torre, Antón García ye “ún de los clásicos vivos, con sensación de ser mui mozu, anque nos autobuses ya lu traten d’usté”. Esi clasicismu atalántase na escoyeta de La mirada aliella. Sicasí, García nun pudo reprimise y hai dalguna qu’otra actualización del material espublizáu.

Les páxines de La mirada aliella recueyen una escoyeta de poemes cola firma de García, pero’l so llabor na lliteratura asturiana nun fina ehí. L’escritor de Tinéu, clave na segunda xeneración del Surdimientu, tien espublizaos tres noveles, delles traducciones, estudios y foi amás fundador de les editoriales Trabe (de lliteratura n’asturianu) y Tsibros del Frou (en bable occidental).

El collaborador de LA VOZ DE ASTURIAS, José Luis Piquero, destaca nel prólogu de La mirada aliella la sensibilidá d’Antón García. Pa él, los sos versos son “una llingua, pero tamién un sentir”. El poeta nun quería que l’encargu del Atenéu Obreru de Xixón finara nuna antoloxía. Poro, decidióse a rescatar delles composiciones inédites, amás de recoyer lo meyor de la so poesía al traviés de Estoiruy Los díes repetíos, dos llibros que güei tán esgotaos y nun puen atopase nes tiendes. La idea ye la de dar daqué más a los llectores que ya tean familiarizaos cola so obra.

La mirada aliella ufierta daqué que nun se pude ver n’otros llibros de poesía n’asturianu. Una bibliografía. L’autor esplica que-y prestaba dar al llibru un rigor científicu. “Podía tar guapa la parte bibliográfica que veo n’otros llibros de poesía pero nunca nún de poesía n’asturianu”.

García entamó la so carrera como escritor espublizando dos o tres poemes en castellán. En 1984 ve la lluz Estoiru, y dos años más tarde, Antón firma en Hojas Universitarias de la mano de José Luis García Martín. Nesti primer llibru viéronse influencies d’Eugenio de Andrade, magar qu’Antón García confiesa que naquel intre nun conocía al poeta portugués (al que traduciría pocu tiempu más tarde). Sin embargu, sí tuvieran daqué que ver cola so forma de facer poemes otros dos autores, el catalán Salvador Espriu y el madrileñu José Bergamín.

El repasu pue sentise como despidida, pero nun ye asina. Na presentación de La mirada aliella, que se cellebró na sé del Atenéu Obreru y na que bona parte de los representantes de la lliteratura asturiana quixeron tar presentes, Antón García anunciaba que ya ta escribiendo coses nueves. “Son diferentes a lo qu’hai equí, pero de xuro serán más de lo mesmo”, brómiábase col públicu. Enantes de que s’asoleyen, los amantes de la poesía puen facer repasu con García percorriendo La mirada aliella.