Seis llingües en Turismu pero ensin l'asturianu

Iniciativa pol Asturianu denunció que la Conseyería de Cultura, Política Llingüística y Turismu estrenara una versión nueva de la so web turística con versión en seis llingües, pero ensin que l'asturianu tea presente ente elles.

L'asociación calificó al traviés de rueda de prensa la situación d'una «oportunidá nueva perdida» pa incluyir l'asturianu nel ámbitu de la promoción turística. Nesi sentíu, espliquen qu'esto «da señales males del camín».

«L'usu del asturianu ha ser tresversal a toles conseyeríes, pero especialmente grave ye qu'un departamentu incluyíu dientro de la Conseyería qu'inclúi l'epígrafe Política Llingüística, nun empiece a facer polítiques de visibilización y normalización como estes, de costu prácticamente cero, dende'l primer momentu», afirmen según informó Europa Press.

Iniciativa esixó que se corrixa la páxina de forma urxente, añadiendo versión n'asturianu y faciendo un usu completu de la toponimia tradicional oficializada en tolos ámbitos.