Espertos dulden de qu'haya diputaos con un desconocimientu «real» del asturianu

Los espertos qu'intervinieron esti xueves na comparecencia informativa pa reformar el reglamentu de na Xunta Xeneral y clarificar l'usu del asturianu duldaron de la posibilidá de qu'exista en dellos diputaos un desconocimientu «real» d'esta llingua como pa nun llegar a entender una invervención nesti idioma, polo que ven necesario reconocer esplicitamente'l derechu a usalu na Cámara pa que nun se pueda dar una interpretación restricitiva de la llexislación vixente en base a una cuestión partidista.

Asina lo señalaron los espertos qu'intervinieron esti xueves na comparecencia informativa pa reformar el reglamentu de na Xunta Xeneral. Na comisión intervinieron el presidente de l'Academia de la Llingua Asturiana, Xosé Antón González Riaño; l'ex diputáu Xuan Xosé Sánchez Vicente; l'historiador Faustino Zapico; el catedráticu de Derechu Alministrativu de la Universidá d'Uviéu, Francisco Bastida Freijedo; y el Catedráticu de Derechu Alministrativu, Alejandro Huergo Lora.

El reglamentu vixente de la Xunta indica que «nel marcu de lo que fixa l'Estatutu d'Autonomía y, nel so casu, pola llexislación que lo desenvuelva, los diputaos van poder utilizar el bable nel exerciciu de les sos funciones parllamentaries». La iniciativa d'IX qu'apoyen PSOE y Podemos propón que «nel marcu de lo que fixa l'Estatutu d'Autonomía y, nel so casu, pola llexislación que lo desenvuelva, tanto los diputaos nel exerciciu de les sos funciones parllamentaries como cualesquier otra persona que compareza énte la Cámara van poder utilizar el bable/asturianu».

Na Comisión d'esti xueves recordáronse los casos de la diputada del PP Gloria García y del portavoz de Vox Ignacio Blanco --esti grupu nun participó na Comisión--. La primera lleyó un testu de Berta Piñán nel actu institucional de la Selmana de les Lletres Asturianes del 2018, pero un añu depués pidió l'amparu de la Mesa de la Cámara porque dicía que nun entendía a la conseyera de Cultura, Berta Piñán, al falar n'asturianu.

Per otru llau, nel casu del diputáu de Vox recordaron que tamién protestó por que Piñán falara n'asturianu, pero que nun ye asina cuando lo fai otru diputáu. Mesmo, indicaron que Blanco ironizó con una intervención del diputáu de Podemos Rafael Palacios porque entendió tol so discursu «menos dos palabres».

Por eso, el catedráticu Franciso Bastida calificó de «contrasentíu» qu'haya diputaos qu'unes veces digan que l'asturianu ye un «castellanu mal faláu» y otres aleguen nun entendelu, polo que propunxo que la Mesa de la Cámara sía la que constate la «incompresión real o ficticia» d'un diputáu hacia esta llingua.

Nesi sentíu, Bastida indicó que permitir l'usu d'esta llingua por cualquier persona ye una «cuestión de llibertá d'espresión» y un derechu recoyíu na Llei d'Usu que nun pue chocar cola garantía de la función parllamentaria. Asina, afirmó qu'usar l'asturianu na Cámara pue entendese como una reivindicación política, pero que los diputaos que pretenden impedir el so usu «tamién ye facer política» al traviés del «obstruccionismu parllamentariu».

Otra manera, el presidente de l'Academia de la Llingua, Xosé Antón González Riaño, calificó de «mui conveniente» la propuesta de reforma del reglamentu pa facilitar l'usu del asturianu nun «espaciu simbólicu mui importante» como l'institucional, onde ve qu'hubo menos avances nestos años. Nesi sentíu, recordó que l'asturianu «ye un patrimoniu de toos y nun tien ideoloxía», polo que'l so usu na Xunta Xeneral permite «que s'use con llibertá pa espresar diferentes opciones polítiques».

L'ex diputáu Sánchez Vicente afirmó de que nestos momentos existe una «campaña de persecución» de los asturfalantes con «epicentru nesta Cámara». «Esto nun tien que ver cola reforma del reglamentu, tien que ver cola persecución del asturianu, porque equí naide ta falando de la oficialidá, falamos de tolerancia», esplicó.

Amás, dixo que l'impedimentu a la conseyera de Cultura pa usar l'asturianu na Xunta Xeneral representa «la negación de los derechos de los asturianos y de la llexislación llingüística vixente», amás d'un «retrocesu democráticu y de convivencia». Otra manera, recordó que'l PP llegó a proponer al PSOE la oficialidá nos años noventa. «Tamos falando de negociu y de votos, cuando interesa sabemos y cuando non nun sabemos», sentenció Sánchez Vicente en referencia a los diputaos qu'afirmen nun entender l'asturianu.

Per otru llau, l'historiador Faustino Zapico culpó de la situación a la «ambigüedá permanente» que vive esti idioma énte «una Llei d'Usu que nun se desarrolla». Amás, acusó a los diputaos que dicen desconocer l'asturianu d'usar un «argumentu revesosu difícil de creer» al ser esta llingua un idioma romance que nun xenera problemes d'intelixibilidá. «Tien qu'haber la voluntá d'entender», esplicó, pa culpar de la «mala fe» impedir a daquién el poder falar n'asturianu.

Unidá de traducción

P'acabar, el catedráticu Alejandro Huergo Lora indicó tamién qu'ensin oficialidá les midíes a tomar van tar «nuna ambigüedá evidente» y que ye un debate que pue zarrar la mesma Xunta Xeneral al traviés del Estatutu y la llexislación que lu desarrolla «y non esconder los problemes como fixo hasta agora». Amás, alertó de que si finalmente s'aprueba la reforma del reglamentu pue siguir existiendo'l mesmu problema si dalgún diputáu vuelve alegar desconocimientu del asturianu, polo que propunxo que la Cámara cuente con una unidá de traducción.

Sicasí, el restu de comparecientes refugaron esta propuesta falando de la facilidá que tienen los asturianos monollingües en castellanu pa entender l'asturianu. El mesmu presidente de l'Academia, González Riaño, quixo escenificar la situación con Faustino Zapico nun momentu de la Comisión, falando'l primeru n'asturianu y el segundu traduciendo al castellanu.

Con too, la situación nun prestó a la portavoz de Ciudadanos Laura Peréz Macho, qu'acusó a los comparecientes d'entamar «un clú de la comedia». Les palabres de Macho xeneraron la respuesta de Rafael Palacios que pidió amparu a la presidencia pola interrupción. «Namás faltaba qu'agora usté calificara les intervenciones de los comparecientes», dixo indignáu Palacios.

Nesi sentíu, el diputáu de Podemos pidió a PSOE, IX y Foru «abrir yá la reforma del Estatutu p'aprobar la oficialidá y nun perder el tiempu con estos debates ficticios». Mentanto, la diputada de Ciudadanos acusó a los comparecientes de «victimismu» y de «faltar al respetu» de los xuristes de la Xunta Xeneral. Mesmamente, llegó a acusar a Bastida de pretender una «neurociencia» pa saber quien pue entender l'asturianu y quien non; informó Europa Press.