La Conceyalía de Deportes d'Uviéu excluye a los equipos lleven na camiseta'l topónimu Uviéu
Agora
La Xunta pola Defensa de la Llingua Asturiana (XDLA) denunció que les bases pa subvenciones namás permiten la forma «Oviedo»
23 Dec 2020. Actualizado a las 18:23 h.
La Xunta pola Defensa de la Llingua Asturiana (XDLA) denunció esti miércoles que les bases pa subvenciones de la Conceyalía de Deportes d'Uviéu excluyen a los equipos lleven na camiseta'l topónimu «Uviéu», dalgo que podía facese hasta agora. Asina, indiquen, namás permite la forma «Oviedo».
Al traviés de nota de prensa, la organización recuerda que la toponimia tradicional de la capital asturiana ye oficial, y polo tanto d'usu llegal, dende 2019. Sicasí, l'equipu d'Alfredo Canteli «desprecia la llegalidá, ensin respetar la forma asturiana».
Coles mesmes, recuerden qu'esti mesmu miércoles el Conceyu d'Uviéu presenta la rotulación nueva de los vehículos de llimpieza y recoyida de residuos, que promocionen el Camín Primitivu de Santiago cola marca «Oviedo, origen del Camino», cuando hasta agora taben rotulaos cola forma oficial «Oviedo/Uviéu».
Por eso, la organización afirma que'l gobiernu municipal «ta demostrando cada día la perceguera que-y da cualesquier cosa que güela a asturianu». «Son dos exemplos más, de munchos, d'una política llingüística que, más qu'inexistente, ye belixerante contra l'asturianu, negándolo y invisibilizándolo», sentencien; informó Europa Press.