Cuasi ocho de cada diez asturianos reciclen en casa los envases del contenedor mariellu

El compromisu col medioambiente al traviés de vezos como'l reciclaxe d'envases convirtióse nuna práctica más nel día a día de la sociedá asturiana. Esa mesma conclusión espréndese d'un estudiu sociolóxicu ellaboráu por Catchment a lo llargo de 2020 ente la población d'esta rexón pa Ecoembes, la organización ambiental ensin ánimu d'arriquecimientu que xestiona'l reciclaxe de los envases domésticos. Según esti informe, el 78,5% de los entrevistaos declara tener dellos cubos, bolses o espacios nos llares destinaos a separtar los residuos pal so posterior reciclaxe, tando siempres ún d'ellos destináu pa los envases del contenedor mariellu. Asina, los llares asturianos cunten con una media de trés cubos o bolses (más concretamente, 3,1), nos que separtar los residuos y da-yos una segunda vida al traviés del reciclaxe.

Ente los principales motivos polos que los entrevistaos declaren separtar los sos residuos, el 94% destaca que recicla porque lo considera importante, anque otros nun lo faigan, mientres que'l 72% diz facelo por arguyu.

El perfil del reciclador top asturianu

Atendiendo a razones sociolóxiques, l'informe reflexa que la separtación de residuos n'Asturies ye un vezu bien estendíu en toles franxes d'edá. Inda asina, son los adultos de 35 a 54 años los que más comprometíos s'amuesen: un 81,8% afirma disponer de más d'un espaciu pal reciclaxe nos sos llares, siendo úb d'ellos pa los envases que se depositen nel contenedor mariellu. Síguenlu bien de cerca los adultos d'ente 25 y 34 años (79%), y los adultos de más de 55 años y de 16 a 25 años, con un 77% y 72% respectivamente.

Amás, los divorciaos y aquellos con pareya estable siguen declarando ser los más comprometíos cola separtación de residuos domésticos, un 100% en dambos casos, siguíos bien de cerca polos casaos (83,6%). Por unidá familiar, aquelles formaes por trés miembros son les más comprometíes (83,7% frente al 78,5% de media). En cuestión de xéneru, les muyeres asítiense unos puntos percima de los homes, una y bones el 82,1% de les muyeres diz ser recicladora frente al 74,5% de los homes encuestaos.

¿Qué tipu de residuos se reciclen más nos llares asturianos?

Los resultaos del estudiu tamién conclúin que los ciudadanos asturianos identifiquen cada vez meyor a qué contenedor va cada tipu de residuu. Asina, el 73,5% de los recicladores afirma axuntar y tirar siempres nel contenedor mariellu les botelles, botes o garrafes de plásticu, el 70,5% nel casu de los briks y el 64,6% nel casu de les bolses, envoltorios o papel film de plásticu. Sicasí, entá hai residuos, como les bandexes o envoltorios d'aluminiu (39,9%) y los aerosoles (36,6%) que nun s'identifiquen con esti contenedor. Pa ello, Ecoembes, pon a disposición de toos de forma A.I.R-y, un bot gratuitu que resuelve toles duldes rellacionaes col reciclaxe al traviés de testu, voz ya imaxe.