Retomen la recoyida de firmes pa salvar el sanatoriu de Bustiello de Mieres

La Plataforma Salvemos el Sanatoriu de Bustiello retoma'l domingu 18 de xunu la recoyida de firmes pa denunciar la situación na que s'alcuentra esti edificiu de Mieres y llevales al Parllamentu asturianu tres el branu. Va ser de 12 a 14.15 hores na confluencia de les cais Jerónimo Ibran y Manuel Llaneza de Mieres, onde'l centru cultural.

«Tamos nuna situación de farura por tener que tar pidiendo les mesmes coses al Gobiernu asturianu añu tres d'añu y que decidan tener escaecíu esti enclave mientres vemos cómo n'otres zones sí qu'empiecen a realizar actuaciones nel patrimoniu. Queremos que vean qu'esti pidimientu ye'l sentir xeneral de la población mierense y vamos tratar de reflexalo na cantidá de firmes que se tán consiguiendo», indiquen dende la plataforma, na qu'alvierten de que cada vez ye más frecuente ver persones «qu'anden a los sos deleres» pela redolada del sanatoriu.

Tamién recuerden que nos actuales presupuestos autonómicos esiste una partida económica pal edificiu de la Botica «que, según paez, entá nun se tuvo nengún interés n'executar». Proponen, pa evitar el deterioru del inmueble, que se lleve a cabu un bon caltenimientu de los teyaos qu'entá esisten y, amás, que s'allume la zona pa evitar daños nos edificios. «Si esta zona nun tuviera tan distante del restu del pueblu y con una nula illuminación quiciabes la so actual situación podría ser distinta», consideren.