El Serida escueye y caracteriza trés variedaes d'escanda asturiana rexistraes como roxa, azul y blanquina

L'equipu de Xenética Vexetal del Serviciu Rexonal d'Investigación y Desarrollu Agroalimentariu (Serida) escoyó y caracterizó trés variedaes d'escanda asturiana, qu'entraron nel rexistru colos nomes de roxa, azul y blanquina, na categoría de variedaes de caltenimientu.

Los tipos nuevos presentáronse esti xueves na Xornada de la Escanda, na que participaron el conseyeru de Ciencia, Borja Sánchez; la directora xeneral de Desarrollu Rural, Begoña López, y la directora xerente del Serida, Mamen Oliván.

L'investigador del Serida Juan José Ferreira foi l'encargáu d'esplicar les variedaes nueves énte los productores."«Conclúyese un programa de meyora col que s'establecen unes llinies homoxénees d'escanda asturiana mui caracterizaes y diferenciables morfolóxicamente», afirmó'l responsable del equipu de Xenética Vexetal.

Les trés variedaes, calteníes nel bancu de granes del Serida, puen diferenciase poles tonalidaes de coloración qu'adquieren les sos espigues na maduración: nel casu de la blanquina, son blanques; nel de l'azul, azulaes; y nel de la roxa, pardes. Tamién hai diferencies na fuercia de panificación de les sos farines: na blanquina y l'azul, ye baxa; na roxa, moderada, informa Europa Press.