MACEAS espón la obra de más de 200 estudiantes nel IES Cuenca del Nalón del 17 al 21 de xunu

El Tallerón del IES Cuenca del Nalón, de La Felguera, va acoyer per segundu añu consecutivu la Muestra d’Arte Contemporáneo Escolar MACEAS. «Faciendo llugar» ye’l filu conductor de les obres que s’espondrán del 17 al 21 de xunu, y nes que trabayaron más de 200 alumnos de 19 centros de toa Asturies. La inauguración va celebrase nel salón d’actos del institutu llangreanu dende les 11 hores del próximu llunes, con una charra de la periodista y escritora Aitana Castaño, a la que va siguir una actuación musical a cargu del alumnáu del centru. Dempués, los asistentes dirán pal Tallerón pa l’apertura oficial de la muestra, na que sedrán los propios estudiantes, autores y protagonistes indiscutibles de la xornada, los que desplicarán les obres. Al actu acudirán miembros del equipu de gobiernu de Llangréu, que collabora dende’l so Área de Xuventú; responsables del Muséu de Bellas Artes d’Asturies y l’asociación Amigos del Muséu, asina como otres figures destacaes del ámbitu artísticu y cultural asturianu.

El grupu de docentes de Dibuxu que punxeron en marcha MACEAS, y cola que busquen poner en valor la educación artística, quixeron qu’esta segunda edición se centre na identidá, el llugar de procedencia y el territoriu. Poro, la llingua asturiana tendrá un papel destacáu na actividá, pues, como señalen los sos organizadores, «ye un patrimoniu cultural indiscutible de la nuesa tierra». La perspectiva de xéneru vertebra los trabayos que van presentase nel IES Cuenca del Nalón. Señalen nesti sen que «toles obres se planteguen, dende los sos inicios, con esa mirada igualitaria y non invisibilizadora de los llogros femeninos, del so papel na hestoria y la cultura». No que cinca a la escoyeta del espaciu espositivu, MACEAS repite nel Tallerón, que nel pasáu acoyó talleres de soldadura y mecanizáu y güei ta en desusu, porque como llugar industrial «ye afayadizu p'aldericar coles propuestes artístiques del alumnáu, que son de lo más variao, yá qu’abarquen videos, instalaciones, pintura, bordáu, testiles, escultura o performances», despliquen.