El gobiernu d'Asturies crea'l Premiu Obdulia Álvarez «la Busdonga» d'asturianada

L'asturianada va tener el so premiu tres la creación d'esti per parte del gobiernu d'Asturies. Un premiu que ñaz col oxetivu de fomentar, protexer y esparder la modalidá musical de l’asturianada por tratase d’un Bien d’Interés Cultural, amás de promover l’usu de la llingua asturiana como llingua vehicular tradicional del cantar asturianu, lo que contribúi al so espardimientu y normalización.

Pa ello, la Conseyería de Cultura Política Llingüística y Deporte crea tres estayes (masculina, femenina y moza) dotada con 6.000€ nes dos primeres y con 3.000€ na tercera. Pa poder participar nesti premiu va ser requisitu indispensable pa participar nel Premiu Obdulia Álvarez «La Busdonga» d’Asturianada quedar, en dalguna de les categoríes que se convoquen, dientro de les seis persones meyor clasificaes nel conxuntu de certames d'asturianada de calter local que s'especifiquen en cada convocatoria. Estos certames locales tendrán que cuntar con sofitu institucional y contemplar les trés categoríes del Premiu Obdulia Álvarez «La Busdonga» d’Asturianada (femenina, masculina y moza).

La concurrencia al Premiu Obdulia Álvarez «La Busdonga» d’Asturianada va ser namás almitible en trés de los formatos artísticos que emanan de la tradición asturiana:

• Asturianaes ensin acompañamientu de gaita
• Asturianaes con acompañamientu de gaita
• Asturianaes con acompañamientu de percusión («vaqueres»)

En cada gala de les previstes nes presentes bases va participar unu de los gaiteros oficiales de los correspondientes certames llocales, utilizándose un sistema rotatoriu que garantice la so alternanza y participación. Les gaites acompañantes tendrán que ser íntegramente acústiques, de tipoloxía, sonoridá y dixitación asturiana. Pal acompañamientu rítmicu de les vaqueres», namás van aceptase resonadores tradicionales y domésticos. Los percusionistes acompañantes de «vaqueres», en casu de ser necesarios, van ser xestionaos pola mesma persona participante.

Les melodíes a interpretar nel Premiu Obdulia Álvarez «La Busdonga» d’Asturianada tendrán que pertenecer al repertoriu tradicional, magar se van aceptar nueves melodíes y lletres, n'asturianu, siempres y cuando cumplan cola estética, estilu, dignidá y singularidá musical del xéneru. Amás, tendrán que tar n'asturianu.

Pa tomar la decisión del premiu van celebrase trés gales previes a la final (semifinales). En caúna d'elles van participar dos persones de les escoyíes como participantes en cada categoría. D'ente toes elles, el xuráu va escoyer la meyor interpretación en cada categoría, siendo un total de 6 persones intérpretes que van pasar a la gala final na que, d'ente los o les intérpretes que superaren les semifinales, va escoyese la persona ganadora pa caúna de les trés categoríes.