El Muséu Arqueolóxicu ufierta visites gratuites n'inglés a la colección permanente
Agora
El percorríu n'inglés ta al cargu del arqueólogu y espertu en mundu clásicu Murray McClellan
20 Sep 2024. Actualizado a las 05:00 h.
El Muséu Arqueolóxicu d’Asturies suma l’inglés a les sos visites guiaes y gratuites, cola mira d’atrayer más visitantes estranxeros. L’equipamientu museísticu xestionáu pola Conseyería de Cultura, Política Llingüística y Deporte vien ufiertando a la ciudadanía la posibilidá de conocer la so colección al traviés de guíes especializaos.
Hasta’l momentu, los itinerarios guiaos realizábanse en castellán, pero dende esti mes inclúyese l’inglés na ufierta cultural y divulgadora qu’impulsa la conseyería al traviés del Muséu Arqueolóxicu d'Asturies.
Les visites guiaes n’inglés a la colección permanente del Arqueolóxicu van llevase alantre nos meses de setiembre, ochobre y payares a les 12 hores. Nestos percorríos muéstrase al públicu visitante’l claustru del sieglu XVI del vieyu monesteriu de San Vicente y les pieces más significatives de la esposición del Muséu. La finalidá ye dar una visión integral, tanto del edificiu históricu que val de sede a la instalación museística como de la evolución histórica d'Asturies dende la Prehistoria.
Les visites n’inglés va dirixiles l’arqueólogu Dr. Murray McClellan. Espertu en mundu clásicu, el Dr. McClellan dirixió y participó n’escavaciones en Chipre, Grecia, Libia, Exiptu, Xordania y Israel, amás d’España. Na so llarga carrera profesional impartió cursos y decenes de conferencies n’Estaos Uníos, Inglaterra, Grecia y Chipre, de la que trabayaba como profesor n’universidaes como la de Boston. Profesor convidáu na Universidá d’Uviéu dende’l 2019, establez agora esta collaboración voluntaria y altruista col Muséu Arqueolóxicu d’Asturies.
La entrada al muséu y la participación nesta actividá ye gratuita. Pa participar ye necesario acutar día y hora, llamando al 985 208 977 (Muséu Arqueolóxicu d’Asturies) nel so horariu d’apertura habitual. El calendariu de visites n’inglés, distribuyíes en grupos integraos por un máximu de 10 persones, ye esti:
- Setiembre: díes 4, 6, 20, 25 y 27.
- Ochobre: díes 2, 5, 16, 19, 23, 26 y 30.
- Payares: díes 2, 6, 9, 13 y 16