Educación convoca la primer edición de los premios estraordinarios d'asturianu y eonaviegu

La Conseyería d'Educación convocó la primer edición de los premios estraordinarios a la conocencia de l'asturianu y del eonaviegu. Estes nueves distinciones van dirixíes a alumnáu de 3º y 4º de Secundaria y de 1º y 2º de Bachilleratu que curse la materia de llingua asturiana y lliteratura en cualquier centru docente. Mesmo que'l restu de premios estraordinarios, van concedese en réxime de concurrencia competitiva. El procedimientu va desenvolver en dos fases: una primer nos centros docentes, incluyida la inscripción, y una final na que van participar aquellos estudiantes que superen la fase inicial.

La conseyería va conceder un premiu pa la categoría de 3º y 4º de Secundaria y otru pa 1º y 2º de Bachilleratu. En dambes establécense dos modalidaes: n'asturianu y n'eonaviegu. Amás, va haber un accésit por etapa nel apartáu de llingua asturiana. Los premios d'esta primer convocatoria van tar dotaos con 800 euros en metálicu por modalidá y etapa, mientres que cada accésit va tener una asignación de 400 euros.

En dambes fases, la estructura de la prueba va constar de cuatro partes, que se van realizar na llingua correspondiente: comprensión de testos orales, producción de testos orales, comprensión de testos escritos y producción de testos escritos. El conxuntu de la prueba va calificase con 100 puntos, 25 en cada parte. La puntuación final va estrayese de la suma d'esos cuatro partes y la so división por 10. Pa llograr la reconocencia de ganador o ganadora de la fase final, la persona aspirante tendrá qu'algamar una media de 8.

En cuanto al calendariu, la inscripción nos centros d'enseñanza pa participar na primer fase va tar abierta dende'l próximu llunes hasta'l 25 d'ochobre, dambos inclusive. Darréu, los centros van empecipiar a partir del 4 de payares el procesu de selección en cada etapa.

A lo último, la prueba de la fase final va tener llugar el 26 de payares. A les 15:45 hores constituyiráse'l xuráu de selección. A les 16:00 hores va llamar al alumnáu aspirante y, quince minutos dempués, va dar empiezu la prueba. La conseyería va disponer hasta'l 27 d'avientu pa presentar la propuesta de concesión de los premios.

La Dirección Xeneral d'Inclusión Educativa y Ordenación va apurrir modelos y formularios pa la inscripción del alumnáu y la comunicación ente los centros y l'órganu xestor. Tamién va ufiertar modelos de prueba a los centros y un protocolu pa facilitar tol procesu. Estos nuevos galardones van pasar a formar parte de la ceremonia d'entrega de los premios estraordinarios que la Conseyería d'Educación convoca tolos años.