Xixón acueye'l Festival In Edit cola estrena del documental de Víctor Manuel

Tres l'ésitu de la so primer edición, el festival In-Edit, el certame de cine documental musical más importante del mundu, torna a Xixón del 15 al 18 de mayu de 2025 con una potente programación qu'axunta estrenos, producciones internacionales y alcuentros con directores. La ciudá asturiana consolídase como sede, más allá de Barcelona, qu'acueye de forma esclusiva esti festival líder nel so xéneru.

El festival va celebrase en dos emblemáticos espacios culturales de la ciudá: la Escuela de Comerciu y el Centru Cultural Antiguu Institutu Xovellanos, que van acoyer les proyecciones y actividaes del 15 al 18 de mayu. La entrada a toles proyecciones va ser gratuita, anque va ser necesaria reserva previa al traviés de la web oficial del festival.

In Edit Xixón 2025 va cuntar con dalgunos de los documentales más prestixosos ya importantes na actualidá empezando pol estrenu n'Asturies y segunda proyección na so hestoria de «Solo pienso en ti», dirixíu por Hugo de la Riva. Un conmovedor documental que narra la inspiradora hestoria d'amor entre Mariluz y Antonio, dos persones con discapacidá que desafiaron los estigmes sociales pa construyir una vida xuntos. Inspirada nel icónicu cantar de Víctor Manuel, esta película esplora cómo l'amor y la resiliencia pueden superar cualquier barrera, convirtiéndose nun poderosu himnu d'inclusión y tolerancia. L'estrenu n'Asturies va cuntar cola presencia del propiu director, que va participar nun coloquiu anterior a la proyección.

Amás d'esti documental, principal atractivu del eventu, van proyectase documentales como «Soundtrack To A Coup D'État», que xune música y conflictos de poder; «This is a film about The Black Keys», que percuerre los oríxenes de la banda; «Scream of My Blood: A Gogol Bordello Story», un retratu de la música mestiza y combativa; «Mogwai: If The Stars Had A Sound», que reflexa la creación del so primer album; «The Stones and Brian Jones», qu'afonda na figura de Brian Jones, fundador de The Rolling Stones y «Elis y Tom: Había que ser contigo», un homenaxe a la hestórica collaboracion ente Elis Regina y Tom Jobim. Tamién va haber momentu pa sesiones DJ, nel Zephyr Bar y n'horariu de vermouth con Kairos y Antón Arrieta.