LA UABRA estrena sede y abre matrícula pa los sos cursos

L'Academia de la Llingua Asturiana ta acabante d’asoleyar la ufierta y la forma d’inscripción nos cursos de la Universidá Asturiana de Branu (UABRA), entamaos a comuña cola Universidá d'Uviéu. El programa de formación llingüística xeneral, del 21 al 25 de xunetu, ye’l compuestu polos cursos Intensivu d'asturianu (nivel B2), El teatru asturianu. Del testu a la escena, y La traducción al asturianu: teoría, práutica y nuevos retos sociales y teunolóxicos. Los tres cursos van facese n'horariu de mañana, nel Campus d'El Milán y tienen una duración de 25 hores.

El cursu intensivu d'asturianu, de nivel B2, ta dirixíu a persones que, teniendo una conocencia elemental del idioma, quieran ameyorar el so nivel nos distintos planos comunicativos. La persona interesada faise responsable d'acreitar esi nivel elemental. El profesoráu encargáu de poner clas va tar formáu por Claudia Elena Menéndez, Pablo Rodríguez Medina ya Inaciu Galán y González.

Pela so parte, el cursu de traducción al asturianu ta dirixíu a les persones que, teniendo una competencia avanzada en llingua asturiana, quieran adquirir les bases teórico-práctiques pal exerciciu de la traducción al asturianu en dellos de los contestos nos que se desenvuelve anguaño esti oficiu. El profesoráu d'esti cursu va formalu Cristina Valdés Rodríguez, Aida Celemín Fuertes, Xaime Martínez Menéndes y Daniel Menéndez Menéndez.

A lo último, el cursu de teatru asturianu ta dirixíu a cualquier persona que tea interesada na historia y representación del teatru asturianu. Ye necesario tener conocimientos del idioma. El cursu van impartilu los profesores María Josefa Rubio Cobas, Laura Cuervo Álvarez, Laura María Iglesia San Martín, Darios de Dios Sanz, Laura Prieto Rodríguez y Antón Caamaño Vega.