Metrópoli abre en Xixón un branu d'eventos culturales

Xixón en branu ye sinónimu d'eventos y festivales. Semana Negra, Semana Grande, Xixón Life... y Metrópoli, ente munches otres actividaes programaes que faen de la villa de Xovellanos l'epicentru cultural d'Asturies. Ye precisamente esti últimu'l qu'abre oficialmente'l branu de Xixón, porque Metrópoli vuelve a la ciudá del 27 de xunu al 6 de xunetu con una programación pa tolos públicos na so docena edición.

Una parte mui importante d'esa programación son los conciertos, que como vien siendo vezu, van celebrase dos al día, unu en cada escenariu (unu a les 21:00 y otru a les 22:30 hores). Esti añu, los conciertos programaos dientro del festival son:

Vienres 27 de xunu: Cycle (21 hores) y Enol (22:30 hores)

Sábadu 28 de xunu: We are Mono (21 hores) y Recycled J (22:30 hores)

Domingu 29 de xunu: Carlos Ares (21 hores) y Juan Magán (22:30 hores)

Llunes 30 de xunu: Los Invaders (21 hores) y Juancho Marqués (22:30 hores)

Martes 1 de xunetu: El Duende Callejero (21 hores) y Molotov (22:30 hores)

Miércoles 2 de xunetu: Bacilos (21 hores) y Fangoria (22:30 hores)

Xueves 3 de xunetu: Salistre (21 hores) y Álvaro de Luna (22:30 hores)

Vienres 4 de xunetu: Paula Koops (21 hores) y Duncan Dhu (22:30 hores)

Sábadu 5 de xunetu: Ramma (21 hores) y Luck Ra (22:30 hores)

Domingu 6 de xunetu: Califato 3/4 (21 hores) y Bresh (22:30 hores)

Pero Metrópoli ye muncho más que conciertos, con actividaes a lo llargo de los díes. Como nos años postreros, Metrópoli Comic Con va ser unu de los puntos con más xente, onde van programase delles actividaes y la visita de dellos autores y actores rellacionaos col mundu gráficu. D'otra banda, ta la esposición de tattoos o les esposiciones «Tesoros de Hollywood», «Terror en miniatura» o «Metro Sneakers», ente otres. Xunto a ello, otres secciones del festival, como Metrópoli, el llugar d'alcuentru pal alderique al rodiu de la igualdá de xéneru, escape rooms, l'Anime Con...

Too ello va tar disponible nel recintu ferial Luis Adaro de Xixón hasta'l 6 de xunetu, momentu nel que va rematar la docena edición, dando pasu yá dende'l 4 de xunetu al siguiente eventu na ciudá, la Semana Negra, nel antiguu espaciu de Naval Xixón. El branu en Xixón ye sinónimu de cultura.