El concursu Europan p'arquitectos mozos recibió 25 propuestes pa rehabilitar l'edificiu de La Maletería, n'Uviéu
Agora
El gobiernu asturianu va executar el proyectu premiáu, que se va conocer n'avientu
08 Jul 2025. Actualizado a las 05:00 h.
Venticinco equipos inscribiéronse yá pa presentar les sos propuestes de rehabilitación del edificiu de La Maletería, n'Uviéu, al concursu internacional Europan, dirixíu a mozos profesionales de l'arquitectura menores de 40 años. El plazu d'inscripción pa presentar propuestes remató'l 29 de xunu. Güei fixéronse públicos los proyectos y el fallu del xuráu va conocese nes primeres selmanes d'avientu.
La Dirección Xeneral de Vivienda propunxo'l pasáu añu a Europan l'edificiu de La Maletería como posible allugamientu pal concursu. En marzu, la organización del certame anunciaba que l'hestóricu inmueble fuera escoyíu, xuntu con otres siete localizaciones d'España, ente los 47 proyectos finalistes pal concursu procedentes de doce países europeos.
«Esti concursu asitia Uviéu y Asturies nel mapa de l'arquitectura europea. Va permitir que seyan mozos los que reinterpreten l'inmueble y va contribuyir a dar una nueva vida al barriu de San Llázaro», valoró Daniel Sánchez, quien tamién repitió'l compromisu del Gobiernu d'Asturies d'executar el proyectu premiáu ya inclusive, dependiendo de la procedencia del equipu ganador, contrata-yos la dirección de les obres.
El tema escoyíu pa Europan 18 ye La ciudá renacida. Pa ello valoráronse trés perfiles: renacer en relación colos elementos naturales, renacer de les maneres de vida compartida y renacer en términos constructivos. El proyectu pa La Maletería se engloba nesta tercer categoría.
Según el documentu presentáu al concursu «lo yá construyío constitúi una enorme fonte de materiales, polo que ye importante diseñar ferramientes de tresformamientu de los edificios esistentes a partir de la estratexa de les 3R (amenorgar, reutilizar, reciclar)». Los oxetivos pasen por amenorgar les nueves construcciones, reutilizar los edificios y materiales y reciclar usando materiales d'orixe biolóxicu (tierra, piedra, fibra), coles mires de caltener los recursos naturales.
Na so decimoséptima edición, el Gobiernu d'Asturies, en collaboración colos conceyos de Muros de Nalón, Sotu'l Barcu y Pravia, propunxera como tema la rexeneración integrada del estuariu del Nalón, qu'incluyía la revitalización de los espacios portuarios, la recuperación de los ecosistemes naturales y l'adaptación a los impactos del cambéu climáticu.
El xuráu, integráu por profesionales de prestíu internacional, fixo públicu'l so fallu pa toa Europa'l 4 d'avientu y estremó dos de les propuestes presentaes pal estuariu asturianu con dos primeros premios.Tamién concedió un segundu galardón y una mención d'honor.