Ñaz Bicicolef, una iniciativa pa que 2.000 escolares usen la bicicleta como'l so primer vehículu

El Gobiernu d'Asturies impulsó'l proyectu Bicicolef empobináu a que polo menos 2.000 escolares usen la bicicleta, non yá como un deporte sinón tamién como'l so primer vehículu.

El director xeneral d'Axenda 2030, Juan Ponte, destacó la importancia d'esta iniciativa pola so contribución p'algamar unu de los Oxetivos de Desenvolvimientu Sostenible, centráu en llograr que les ciudaes y los asentamientos humanos seyan inclusivos, seguros, resilientes y sostenibles. Algamalo «pasa por modificar sustancialmente'l modelu de movilidá y la configuración de los espacios de vida actual», aseguró.

Frente al usu masivu de los automóviles, Ponte defendió la necesidá de poner a les persones nel centru, con medios de tresportes saludables, eficientes y respetuosos col mediu ambiente, polo que l'usu de la bicicleta ye una alternativa ideal en desplazamientos curtios, tanto a los centros de trabayu como, nesti casu, a los centros educativos. «Búscase que nestos trayectos se xenere menos consumu enerxéticu, qu'haya menos contaminación, menos accidentes, menos estrés y menos gastos, y pa ello ta precisamente la necesidá de fomentar l'usu de la bicicleta», esplicó. «Nun se trata de desaniciar los coches, sinón d'ameyorar sustancialmente y significativamente l'usu de la bicicleta na repartida modal», matizó.

Manuela Ena señaló, pela so parte, la importancia de l'actividá deportiva más allá de les competiciones pa entendela como «una ferramienta tresversal a munches árees de la vida», afirmó. «La bicicleta ye un mediu que collabora pa llograr unos vezos saludables, daqué especialmente importante na infancia y na adolescencia», añedió.

Castellanos sorrayó la importancia de la educación y l'actividá físiques, que son «clave» pa tresformar la sociedá: «Hai un compromisu social pela nuesa parte que contribúi a los retos marcaos pola Axenda 2030».

Los oxetivos de Bicicolef, que busca tamién animar al alumnáu que nun sabe andar en bicicleta a aprovechar esti proyectu p'aprender, son llograr una educación de calidá inclusiva y equitativa amás de promover vezos saludables. Pa ello, creóse un bancu de materiales con bicicletes, cascos y, nun futuru, patinos, y va ufiertase formación y recursos didácticos pal profesoráu d'Educación Física.