El festival de cine Avilés Acción va homenaxear a Javier Gutiérrez na so XXIV edición

Esta mañana dábase a conocer que Javier Gutiérrez, actor perconocíu nel panorama estatal y consideráu tamién internacionalmente, va ser el prósimu reconocíu col Premiu Homenaxe del Avilés Acción Film Festival na so XXIV edición.  El públicu va tener tamién la oportunidá d’esfrutar d’un alcuentru abiertu col actor, en collaboración cola Cátedra de Cine d’Avilés.

Javier Gutiérrez algamó la fama tanto por papeles televisivos en series como Los Serrano, Águila Roja o Estoy vivo, como por películes como Días de fútbol, El penalti más largo del mundo, La isla mínima, 1898: Los últimos de Filipinas o Durante la tormenta. La so carrera televisiva aníciase con papeles enfocaos más bien pa la comedia, mui davezu dando vida con solvencia a personaxes cliché del imaxinariu español o poniendo’l contrapuntu cómicu. Sicasí, l’actor llogró sorprender al públicu y a la crítica, algamando mayor reconocimientu precisamente con papeles dramáticos como los que-y valieron los dos Premios Goya que recibiere por  El autor y  La isla mínima (película que tamién lu llevó a ganar la Concha de Plata del Festival de Cine de San Sebastián, ente otros reconocimientos). Estes y otres actuaciones abriéron-y les puertes del cine internacional y participó na película del videoxuegu Assassin’s Creed xunta actores como Michael Fassbender, Marion Cotillard o Jeremy Irons.

Con casi un cientu películes al llombu y reconocimientos a tola carrera como’l I Premiu Isaac del Rivero a la Trayectoria Profesional qu’otorga’l FICX, Javier Gutiérrez ye tamién un actor volcáu nel teatru, acumulando casi 30 papeles mientres más de 30 años de carrera nos escenarios y recibiendo dellos premios y homenaxes.

El Premiu Homenaxe d’Avilés Acción ye un reconocimientu mui especial a una carrera profesional marcada pol trabayu, la constancia y la versatilidá. Un premiu que de xuru nun va ser l’últimu.