El Festival Internacional de la Gaita asoleya la so programación completa

La gaita vuelve a sonar en Villaviciosa y, con esta, yá son dieciocho les ediciones que suma'l Festival Internacional de la Gaita, entamáu pola Banda de Gaites de Villaviciosa - El Gaitero, dirixida pol multinstrumentista Edu Llosa. Son delles les novedaes del festival, qu'esti añu cuenta inclusive con sintonía oficial, creada por Alienda de manera esclusiva pal eventu, y que lleva por nome El rescamplíu.

La 18ª edición del F.I.G. va llevase a cabu ente los díes 4 y 7 de setiembre. La programación va dar empiezu'l día 4 dende les 18:00 hores cola inauguración de la esposición «Asturies n'otra dómina: muncho más que ropa», una amuesa de traxes tradicionales asturianos que pertenecen al grupu de baille San Félix de Candás. Darréu, la Banda de Gaites de Villaviciosa va animar la villa con un pasucais, dando pasu a l'actuación de Borja Baragaño, Simon Bradley y Julio Rodríguez, toos ellos integrantes del grupu Llan de Cubel. La primer xornada va rematar con una jam session.

El segundu día, vienres, a partir de les 17:00 hores abre les sos puertes el mercáu artesanu, acompañáu de pasucais y actuaciones musicales. Mientres la tarde, va ser el tiempu de Cabu Peñes, Xinzo de Limia y la Bandina de Villaviciosa. Yá a les 19:30 hores va ufrise una charra divulgativa sobre'l floréu de la gaita asturiana, al cargu de Balbino Fernández y Ricardo Soberado, con participación del alumnáu y profesoráu de la Escuela de Música Tradicional de Villaviciosa. Pa rematar la xornada, va celebrase la IX Nueche en Danza, que va cuntar cola participación de Pandereteros d'anguaño, Los Collaínos y el Grupu Etnográficu L'Oriente.

La celebración de la gaita sigue de sábadu con una xornada dedicada a la música en vivu y a l'artesanía tradicional. Pela mañana, va desenvolvese'l taller «La fabricación del payón y axuste del roncón na gaita asturiana», impartíu pol profesor Pelayo Fernández, previa inscripción y pagu de tases. Mientres tol día, delles bandes van percorrer les cais maliayeses, de la mesma que se va celebrar un alcuentru d'artesanos d'instrumentos tradicionales y una actuación del grupu de baille San Félix de Candás, la fiesta de la sidra, un taller didácticu infantil o el vermú gaiteru. Yá pela nueche, va asoceder l'Alcuentru de Bandes de Gaites del F.I.G y la nueche folk, que va xubir al escenariu a Felpeyu, Malin Lewis y Skama La Rede.

El festival va llegar a la so fin con una xornada enllena d'actividaes que va entamar col XV Concursu de Gaiteros y Gaiteres Memorial José Huerta. A lo llargo del día, dellos bares acueyen actuaciones de bandines tradicionales y, de nuevu, nun va faltar el vermu gaiteru. La programación inclúi, amás, un conciertu didácticu de Malin Lewis y el VI Certame de Canción Asturiana Xavi Solares, que va axuntar les voces de Carlos Velasco, Alicia Villanueva, Andrés Cueli y Andrea Cueli, acompañaes pola gaita de Valentín Fuente. Como zarru a esta intensa edición, va celebrase la segunda Nueche Folk, coles actuaciones de Soi Panderetera, Boj y N'ochebre, poniendo'l ramu a un festival cargáu de tradición, música y cultura.