Samartín de Lluiña vuelve a los sos raigaños vaqueiros

Samartín de Lluiña, el pueblu de Cuideiru que presume de raigaños vaqueiros, vuelve per 23ª vegada a celebrar el Mercáu Vaqueiru. Va ser mientres el primer fin de selmana d'agostu, los díes 2 y 3, cuando'l pueblu vuelva sobre los sos raigaños, presentes na mayoría de los vecinos. Mientres dos díes, Samartín va esfrutar de la cultura vaqueira y asturiana.

La 23ª edición d'esta fiesta considerada d'Interés Turísticu d'Asturies entama bien ceo, a les 8:30 hores del 2 d'agostu, cuando va arrancar la XI Ruta vaqueira, a cargu del grupu de montaña y senderismu La Chiruca, previa charra sobre los vaqueiros d'alzada impartida pol historiador y comunicador Raúl Alonso. Yá a les 12:00 hores, va facese la inauguración oficial del mercáu al cargu d'Eva López Fernández, vaqueira de Modreiros y secretaria de l'Asociación de Vaqueiros d'Alzada del conceyu de Balmonte. Darréu, va entamar el taller de títeres de mitoloxía asturiana pa neños y neñes nel centru social Mario Folgueras. Pela tarde, la tradición va siguir colos xuegos tradicionales asturianos con 6 Conceyos y, a les 20 hores, turnu pa la música folk col grupu La ciudá nel mar.

La xornada del domingu va entamar a les 12:00 hores cola apertura del mercáu y media hora depués va llegar la concentración de Seat 600. Pela tarde, tiempu pal baille y la música tradicional: d'una banda, el grupu de baille de Cuideiru, Arduriu Pixuatu, a les 17 hores y a les 20 hores conciertu de les Pandereteres de Somiedu. Amás, mientres tol mercáu, va haber exhibición de gües, artesanos... y con chigre al cargu de la comisión, onde van vendese tortos artesanos.