La Vuelta aporta a les tierres asturianes cola mirada en Palestina y baxo la tensión pola participación del Israel - Premier Tech

La Vuelta a España aporta a Asturies con niveles de máxima tensión y non polo deportivo. Los ciclistes van percorrer les carreteres asturianes mientres el vienres el sábadu en dos etapes de montaña con final en L'Angliru y en La Farrapona, onde'l lider actual, Jonas Vingegaard (Visma - Lease a Bike) va intentar sacar distancia a los sos rivales más cercanos, magar del minutu de diferencia que yá-y saca al segundu.

Sicasí, lo deportivo pasa a un segundu planu na Vuelta a España por mor de la presencia del equipu Israel - Premier Tech nel pelotón. Fueron munchos los espacios onde los ciudadanos protestaron pola so presencia tres el xenocidiu que l'estáu d'Israel sigue acometiendo acaldía en terrén palestín. Yá en Bilbo, la organización tuvo que suspender los trés quilómetros últimos de la etapa poles protestes escontra l'equipu mentáu y tamién na etapa de contrarreló por equipos tuvo qu'actuar la organización tres l'acción d'activistes palestinos na que pararon por completu la marcha del equipu israelí.

N'Asturies, la situación nun va camudar y la plataforma Asturies con Palestina tien yá programaes delles protestes pal vienres y sábadu a lo llargo de les etapes que van desenvolvese per Asturies, con concentraciones nos principales núcleos de población, como Nava o Ciañu, pero tamién nes metes n'altu de L'Angliru y La Farrapona.

La propia escuadra ta viviendo nestos últimos díes les consecuencies del xenocidiu en Palestina coles protestes en La Vuelta, pero nun son los únicos movimientos al rodiu del equipu. Unu de los sos meyores corredores, el canadiense Derek Gee, ta acabante de rescindir el contratu por «razones llexítimes» y una «continuidá insostenible». El xenocidiu en Gaza sigue presente ya inclusive los ciclistes eviten correr pal equipu que lleva'l nome del estáu.

Dende la organización de la propia carrera yá se llanzaron declaraciones a favor de la esclusión del equipu de la carrera por cuestiones de seguridá, anque la decisión ha tomala la Unión Ciclista Internacional. Pela so parte, l'equipu Israel - Premier Tech dexó claro tres los socesos de Bilbo que la so intención ye acabar la carrera en Madrid y nun van abandonar.