Les pruebes de certificación d'asturianu dupliquen les inscripciones
Agora
Más de la metá d'esos inscritos, en concretu 136, va optar al nivel avanzáu C1. Síguen-y el nivel intermediu B2, con 78 persones, y el nivel básicu A2 ?que s'ufiertó per primer vegada en 2024? con 33 inscripciones
29 Sep 2025. Actualizado a las 13:06 h.
La Conseyería d'Educación entamó esti sábadu la parte escrita de les pruebes de certificación de llingua asturiana, na Escuela Oficial d'Idiomes d'Uviéu. Esta sesta edición destaca por doblar la cifra d'inscripciones: 247 aspirantes pa los trés niveles ufiertaos, frente a los 121 de la convocatoria del añu pasáu.
Más de la metá d'esos inscritos, en concretu 136, va optar al nivel avanzáu C1. Síguen-y el nivel intermediu B2, con 78 persones, y el nivel básicu A2 ?que s'ufiertó per primer vegada en 2024? con 33 inscripciones.
Les pruebes de certificación consten de cinco partes independientes: comprensión de testos escritos, comprensión de testos orales, producción y coproducción de testos escritos, producción y coproducción de testos orales, y mediación. Pa llograr el certificáu hai qu'algamar, a lo menos, una puntuación de 5 en caúna de les partes y un 6 de promediu ente toes.
La conseyería nomó trés tribunales —unu per cada nivel— pa puntuar les pruebes, que tán integraos por profesoráu funcionariu de carrera del cuerpu de Secundaria y llingüistes espertos n'asturianu.
La evaluación va tomar como referencia los oxetivos, competencies, conteníos y criterios establecíos nel Decretu 27/2019, de 21 de xunu, pol que s'establecen los niveles de competencia nel usu de la llingua asturiana y regúlase la prueba de certificación correspondiente a dichos niveles afechos al Marcu Común Européu de Referencia de les Llingües (MCER).
La Conseyería d'Educación encargóse de la convocatoria, ellaboración, inscripción, loxística, organización y aplicación de les pruebes. Amás, va expedir los certificaos de superación al traviés del centru desaminador. Nel procesu d'inscripción collaboraron de nuevu los IES Aramo, d'Uviéu/Uviéu; Calderón de la Barca, de Xixón; Carreño Miranda, d'Avilés, y Bernaldo de Quirós, de Mieres.
Les pruebes orales van realizase ente los díes 6 y 16 d'ochobre nel IES Alfonso II, d'Uviéu, en convocatories personalizaes. N'Educastur tán publicaos yá los distintos llamamientos cola aula asignada, la fecha y la hora del exame.