L.A.: «Podría vistir los cantares de la manera que quixera que si canto yo yá sedría L.A»

El músicu mallorquín L.A. anuncia la so esperada vuelta a los escenarios coincidiendo col llanzamientu del so nuevu EP, «A Modern Tour». Lloeñe de retrucar fórmules pasaes, esta xira concíbese como un proyectu dinámicu y mutable. L.A. diseñó un repertoriu que va esperimentar un tresformamientu continuu tanto no fondero (la selección de temes) como na forma (los arreglos y la instrumentación). La premisa central ye ufiertar una esperiencia única en cada parada: el públicu nun va asistir al mesmu espectáculu dos vegaes. Esti enfoque asegura que la selección de cantares, el formatu de la banda y la mesma sonoridá del directu van suponer un xiru radical al respective de lo plantegao nes sos anteriores xires, prometiendo una de les sos propuestes escéniques más ventureres ya interesantes hasta la fecha. Díes enantes de la so puesta en escena en Xixón, esti vienres 24 d'ochobre na Sala Acapulco, conocemos más d'esti proyectu.

—El to nuevu EP, A Modern Tour, revisita trés de los tos temes más conocíos en versión remix. ¿Qué te llevó a reinterpretar estos cantares en llugar de presentar material dafechu nuevu?

—La idea nació mientres la mesma xira... Onde estes revisiones yá tán sonando. P'averar un pocu más dalgunes de los mios cantares d'otros discos al nuevu soníu d'A Modern Odyssey decidimos da-y una llavadura de cara… y darréu asocedióme crear esti EP de compañeru perfectu pa la xira.

—Inclúis tamién dos versiones «Garage Sessions» más íntimes. ¿Qué te atrai d'esti formatu y qué crees qu'aporta a la to relación colos cantares?

—Pues mesmo que les otres trés revisiones más baillables o más cercanes al últimu discu, quixi incluyir l'otru formatu col que tamos xirando estos díes, que ye'l llau opuestu... Más cenciellu, más garage, más como cuando empecé a tocar nel garaxe de casa, guitarra y batería, directu al corazón.

—El nuevu soníu entemez la fuerza del rock con una enerxía más hedonista y bailladera. ¿Cómo llogres permediar eses dos facetes ensin perder la to identidá artística?

—Creo que dempués de tantos años y de tantos discos yá puedo dicir que tengo'l mio soníu, que parte directamente de la mio voz... Podría vistir los cantares de la manera que quixera que si canto yo yá sedría L.A., y eso ye bono pero tamién malo, una y bones tengo que trabayar muncho'l soníu de la voz pa facer daqué totalmente distinto.

—La xira «A Modern Tour» llega esti 24 d'ochobre en Xixón. ¿Cómo tas preparando'l repertoriu y qué puede esperar el públicu d'esti nuevu directu?

—La idea ye dir col formatu más cenciellu, ta prestándome de sópitu volver a esa llibertá de repertoriu onde puedo dar reblincones na mio discografía según me lo vaiga pidiendo la situación… Ensin repertoriu previstu.

—Trabayasti con Dimas Frias nos remixes. ¿Cómo foi esa collaboración y qué papel tuvo él na evolución sonora del proyectu?

—Con Dimas tamos en constante conexón, son munchos años y ye versátil al máximu nivel, entendémonos perbién, y al igual qu'asocedió n'A Modern Odyssey, el mio últimu discu onde Dimas foi co-productor, basta con da-y cuatro directrices y sabe perfectamente lo que quiero. Un lluxu.

—Los tos siguidores acomúñente con una fuerte identidá sonora y visual. ¿Qué papel xuega la estética y la puesta n'escena nesta nueva etapa?

—Este últimu añu hebo munchos cambeos estilísticos, una constante busca y esperimentación… Tengo'l defectu de que, al gustame tantos artistes de tantos estilos distintos, a la de producir la mio propia musica, y de sacala al esterior quiero ser Spiderman, Batman, Thor y Hulk coles mesmes… un non parar.

—Cada llanzamientu tuyu paez marcar una transición. ¿Sientes qu'A Modern Tour EP cierra una etapa o abre una dafechu nueva?

—Podría selo si, inclusive'l conceptu de la portada inclúi dellos elementos clave… el cascu d'astronauta del mio últimu discu, los cuervos del mio primer discu «Heavenly Hell» y tou dientro d'un xirasol, que siempres xira buscando al sol… Y asina toi yo costantemente... Xirándome ensin parar.. Buscando siempres el sol.

—Mirando p'alantre, ¿qué te gustaría esplorar dempués d'esta xira y d'esti EP? ¿Hai nuevos soníos o proyectos en camín?

—Yá tengo coses nueves, inclusive un nuevu proyectu de cero.. pero entá ta por ver a ónde va llegar… Agora toi con un proyectu mui ambiciosu que ye'l mio propiu festival, a la mio midida y al mio gustu, colos artistes que más m'atraen y dalgunos qu'almiro dende siempres. Tamos en fase de contratacion y de dibuxu del proyectu, va celebrase en Mallorca n'ochobre de 2026 y creo que va sorprender a mas d'unu.