La Xira Didáctica llega a Avilés con actividaes pal alumnáu d'asturianu y gallego-asturianu

La Xira Didáctica llega a Avilés con actividaes pal alumnáu d'asturianu y gallego-asturianu. El Conceyu d'Avilés, per aciu de la so conceyalía de Normalización Llingüística, collabora nel desendolcu d'esti circuitu de dinamización cultural y educativa, pensáu pal alumnáu d'asturianu y gallego-astuiranu, ofreciéndo-yos a los centros educativos el catálogu d'actividaes diseñçáu, que xunta un conteníu educativu singular, empobináu a dellos rangos d'edaes específicos, con calidá artística y cultural, adecuáu al so públicu oxetivu. 

La Xira Didáctica percuerre diferentes conceyos asturianos, ente los que ta Avilés, pa facilitar que tola comunidad educativa tenga accesu a esta programación, na que les llingües vehiculares van a ser l'asturianu y el gallego-asturianu (eonaviegu o fala). 

Los oxetivos son, ente otros:

-Dar a conocer el trabayu de profesionales en varios ámbitos como les artes escéniques, la música, el cine, la ciencia, la historia, la lliteratura, arquitectura, l'arte, etc.

-Averar a la comunidá educativa del Principáu d'Asturies una programación d'actividaes didáutiques y artístiques diferentes y de calidá que puedan sirvir de complementu a los conteníos que se dan en clase.

-Ayudar a la promoción, espardimientu, normalización y usu del asturianu y el gallego-asturianu (eonaviegu o fala)

-Puxar pol desendolcu de costumes y de consumu culturales ente públicu variáu y dende mui pronto nel so entornu más cercanu.

-Puxar pola convivencia y la rellación ente escolines y escolinos del Principáu fuera del entornu que tienen más cerca.

Nesta primer Xira Didáctica, Avilés tendrá dos de les actividaes ufiertaes: un taller d'audiovisuales en varies sesiones y un conciertu. Van facese les dos nel salón d'actos del Centru Sociocultural de Los Canapés. 

Los díes 12 y 13 de payares fadráse'l taller d'audiovisuales entituláu «¡El Nuesu Curtiumetraxe!», en tres sesiones de 30 participantes caúna. A ellos va dir el mesmu alumnáu de les escueles Luisa de Marillac y Marcelo Gago, nesti horariu: 

Miércoles 12 de payares

12:00h. Con 15 alumnes y alumnos de la escuela Luisa de Marillac y 15 del CEIP Marcelo Gago  

Xueves 13 de payares

9:30 h. Con 30 alumnes y alumnos del CEIP Marcelo Gago

12:00 h. Con 30 alumnes y alumnos del CEIP Marcelo Gago 

La segunda actividá, nomada «Restolando», llegará'l 21 de xineru, a les 11:00 hores. Sedrá un conciertu didáuticu p'alumnáu infantil a cargu del conocíu músicu asturianu David Varela, quien va usar hasta trenta instrumentos y coses de casa —como panderos, carraques, botelles, morteros, cuyares, sartenes, cazos o guantes— pa quita-yos el mieu a neños y neñes a facer música y sacar soníos a tolo que tengan cerca, poniendo un poco imaxinación y ganes. L'actividá contará cola participación d'hasta 200 escolinos, escolines y profesoráu.