Naz Curuxa Fest, el festival de música negra de Xixón

El barriu de Ciares, en Xixón, va acoyer los díes 20 y 21 de marzu la primer —y esperada— edición de Curuxa Fest, un weekender autoxestionáu dedicáu a la música negra y, mui especialmente, a los ritmos xamaicanos. El festival garra’l nome de la curuxa (Tyto Alba), un ave venceyada al saber —«saber más que les curuxes»— y tamién a lo nocherniego, lo misterioso, lo pagano y lo comunitario na mitoloxía asturiana. Esi espíritu d’alcuentru, esfrute y resistencia contracultural enllena tola filosofía del eventu. De xuru, tamién ye un evidente homenaxe a la cultura del Northern Soul y a los bailes acrobáticos y discos raros de soul hasta altes hores nel Wigan Casino d’Inglaterra.  

Un festival fechu a mano: vinilu, comunidá y cultura musical 

Curuxa Fest naz de la pasión polo analóxico, el failo tu mesmu y la tresmisión d’una cultura musical que vertebró bona parte del sieglu XX a golpe de vientu metal y acetatu. Impulsáu pol Ciares Soul Club —referente en Xixón pola so trayectoria espardiendo soníos elegantes— y Shake it to me! Club, colectivu de la meseta qu'enllenaba l’aforu cada nueche en Malasaña. Dambos comparten una visión inclusiva y alloñada del elitismu: un espaciu amable, abiertu y con precios populares pa esfrutar de la música y fortalecer vínculos.

El festival cuenta amás col sofitu d’UC Ceares, AVV Esto ye Ciares y Páramo Bar, reforzando la so conexón cola vida comunitaria del históricu barriu obreru de Ciares.

La programación del I Curuxa Fest

Vienres 20 · Allnighter en Páramo Bar

L’apertura del festival va tener llugar en Páramo Bar, onde DJs de distintos puntos de la península van ufiertar una allnighter 100% vinilu, esplorando ska, rocksteady, soul, reggae y otros soníos de raigañu negru.

Sábadu 21 · Mercaín, vermú y música tol día

A mediodía, el Campu de fútbol La Cruz va tresformase nun mercaín con fanzines, discos y otros artefactos pa los amantes de les subcultures underground. La xornada va tar acompañada por una sesión vermú en vinilu y la presentación del llibru Durkheim marca un gol de Leonardo H. Pelayo, reforzando’l calter cultural del alcuentru. Pela tarde y nueche, el festival va treslladase al icónicu Casino de Xixón, Sala Acapulco, onde va tener llugar el so platu fuerte: un allnighter con conciertos y sesiones de DJs.

Conciertos destacaos

L’escenariu principal va recibir a dos nomes clave de los ritmos xamaicanos nel Estáu: 

The Magnetophones (Zaragoza): activos dende 2008, reinterpreten los grandes clásicos del ska, el skinhead reggae, el rocksteady y el soul con un estilu propiu que bautizaron como reggaeloo.

Treverb (aka Skakeo): la banda de Lasarte-Donostia presenta discu nuevu tres la so etapa como Skakeo Taldea, conocida pola so enerxía y pola so conexón colos jamaikar doinuak (ritmos xamaicanos) dende Euskadi. 

A ellos van sumase DJs y colectivos de tola península, caún aportando la so visión particular de la música negra y arriqueciendo la pista con selecciones esclusives en vinilu.