El sellu Ximiégalo Records asoleya la so primer referencia en vinilu

Ximiélgalo Radio Show, el proyectu radiofónicu centráu nos sones xamaicanos y qu'usa l'asturianu como llingua vehicular, llanza un cenciellu en 7 pulgaes pa festexar los sos 5 años d'emisión en Radio Kras (105.0 FM de Xixón). Nesti single alcuéntrase un corte instrumental interpretáu y compuestu pola sección de vientos estremeña Sherlock Horns (Pedro Caballero y Toni Martín) y producíu, grabáu y mezcláu pol sevillanu Mario Garcia de Cool Up Records.

Esti tema yá ye un clásicu pal públicu reggae nel estáu ya qu'esta dupla tienlu interpretáu en directo en sitios tan emblemáticos como'l Parque de L'Alameda de Sevilla o en festivales como Rototom Sunsplash o Gijon Sound Festival. Amás, ye la sintonía actual d'esti programa de radio asturianu.

Tres años siendo un dubplate esclusivu que namás se podía sentir nos entamos de los episodios de Ximiélgalo Radio Show, nes pinchaes de Miguina Selektah o nos shows en vivu de Cool Up Records y Sherlock Horns, agora'l sellu más ximielgueru publica esti temazu xunto a la so correspondiente ya exclusiva versión dub. Un vinilu de calidá extra con un grosor superior a lo que ye vezu nos singles y con una cuidada y llimitada edición de 200 copies que va a tar a la venta a partir del 9 de marzu a un preciu de 14 euros. La presentación d'esti single va facese'l día 7 de marzu a les 11:30 na Mita Record Store, na que Miguina Selektah va facer una pinchada.