Banksyastur finaliza la so campaña solidaria con donaciones a proyectos sociales, sanitarios y educativos

La campaña solidaria 2025-2026 impulsada por Banksyastur, seudónimu de Fernando Argüelles, llegó a la so fin tres meses d’intensa actividá social, cultural y solidaria n'Asturies. El proyectu, que xira alredor de la creación de calendarios de paré y d’una gala benéfica, volvió apostar esti añu pola visibilización de la salú mental dende una perspectiva comunitaria y de apoyu mutuu.

El calendariu d’esta edición xugó cola toponimia de les distintes poles asturianes, construyendo una metáfora simbólica: la unión de toles poles nuna sola «POLA salú mental», reivindicando la importancia de la comunidá, los venceyos sanos y la empatía frente al individualismu.

Dende la organización recalquen que’l resultáu de la campaña ye, una vegada más, un llogru colectivu. Nel procesu participaron decenes de persones y colectivos: artistes y profesionales de la música, el teatru, la imaxe, l’audiovisual, el diseñu o la comunicación que collaboraron de manera altruista na gala; negocios de barriu que funcionaron como puntos de venta; persones voluntaries que sofitaron nel repartimientu y la venta de calendarios; medios de comunicación que dieron visibilidá a la iniciativa; asociaciones vecinales y colectivos sociales qu'acoyeron presentaciones; y profesionales del ámbitu de la psicoloxía, la sanidá, la lliteratura, el deporte o la cultura que respaldaron públicamente la campaña.

L’oxetivu central del proyectu foi visibilizar la salú mental dende una mirada comunitaria, apostando pola creación de redes de cuidu mutuu y vínculos saludables. La campaña reivindica una visión biocéntrica del ser humanu, entendiendo que les persones somos seres biosicosociales y que la salú mental tien que ver cola empatía, la solidaridá y la conciencia colectiva.

La segunda gala solidaria, celebrada nel Auditoriu de Mieres el 28 de payares, volvió enllenar l’espaciu y permitió recaldar fondos pa crear recursos de sofitu pa persones afectaes pol suicidiu, en collaboración cola asociación Abrazos Verdes. L’eventu consolidóse como un espaciu cultural y solidariu que busca prevenir sufrimientu y acompañar procesos de duelgu.

Pela so parte, la recaldación procedente de los calendarios solidarios permitió impulsar distintes acciones sociales y sanitaries:

• Cáncer infantil: donación a la Fundación Botón d’un dispositivu de medición de composición corporal por bioimpedancia (BIOPYx PERT Z3-Bx3), que permite orientar l’actividá física en neños, neñes y adolescentes con cáncer, fortaleciendo’l so sistema inmunolóxicu.
• Sofitu a la asociación Galbán pa programes de música nel hospital y financiación d’un conciertu solidariu celebráu n’Uviéu tres la carrera solidaria contra’l cáncer infantil.
• Abrazos Verdes: fortalecimientu del recursu d’acompañamientu pa persones supervivientes de suicidiu gracies a la recaldación de la gala.
• APRAMP: financiación d’atención xinecolóxica d’urxencia nuna clínica especializada pa muyeres y neñes víctimes de trata y prostitución.
• No Name Kitchen Team Asturies: apoyu a un equipu deportivu que funciona como espaciu terapéuticu y de integración pa persones migrantes, utilizando’l deporte como ferramienta pa crear vínculos y combatir prexuicios.
• ASPACE Xixón: donación d’una pizarra dixital interactiva con soporte móvil, destinada a favorecer la participación, l’aprendizaxe multisensorial y el desenvolvimientu cognitivu de persones con parálisis cerebral.
• Intervención social y educativa: entrega de material tecnolóxicu, escolar y equipamientos básicos a les asociaciones Sietes Apurriendo y Espacios Mistos, que trabayen con menores en situación de vulnerabilidá social.
• Productos de primer necesidá: entrega d’alimentos non perecederos, dulces pa la infancia y productos d’hixene al Postigo Solidariu y a la iniciativa Echando un Gabitu.
• Salú visual internacional: donación prevista de 100 lentes intraoculares a la ONG Stop Ceguera, destinaes a ciruxíes de catarates en países con escasos recursos, permitiendo recuperar la visión a persones que d’otra manera quedaríen con ceguera permanente.

Dende la organización señalen que la campaña pretende siguir creciendo nos próximos años, ampliando l’algame de les aiciones solidaries y fortaleciendo la idea de que la solidaridá, la cultura y la comunidá son ferramientes fundamentales pa cuidar la salú colectiva.