Folixa de 20 años de Skama la rede convida a una quincena de músicos nel Kuivi d'Uviéu

La sala Kuivi Almacenes d'Uviéu va acoyer el vienres 20 de marzu la Folixa 20 años de Skama la rede, un conciertu especial col que la banda asturiana de ska-punk va celebrar les más de dos décades de trayectoria y el so últimu trabayu discográficu. La cita, que va durar alredor de dos hores, ta pensada como un eventu especial nel que'l grupu va compartir escenariu con una quincena de músicos d'otres formaciones. Les 500 entraes que se punxeron a la venta yá tán escosaes dende hai una selmana.

Ente los nomes confirmaos destaquen dos figures bien conocíes de la escena estatal: Juankar Cabano, voz y baxu del grupu madrilanu Boikot, y Gabri Reigosa, voz y guitarra de la banda gallega Dakidarría. A ellos súmense dellos artistes asturianos, como Xune Elipe (Dixebra), Daviz Rodríguez (Mala Reputación), Raquel (Ochobre), Pirri (Escuela de Odio), Humber (Misiva), Delfo (La Tarrancha) y Berto (Skontra), que van participar nesti conciertu conmemorativu.

Amás, el grupu tien confirmaos a dellos otros músicos que van collaborar nel escenariu, ente ellos Xuan Rodríguez (Llan de Cubel y Matazúa), Natalia Menéndez (Ochobre), Daniel Álvarez (Corquiéu), Pastrana (Skontra) y la gaitera candasina Aida Sánchez. La nueche va entamar a les 21.00 hores col DJ Avante'l Pueblu, que tamién va ser l'encargáu de poner el ramu a la celebración. El conciertu, según anunció la organización, va ser grabáu en videu y n'audiu col envís d'asoleyar dalgunes de les sos partes nos próximos meses.