Hereu destaca la importancia que vuelve tener el sector mineru n'Asturies énte l'actual contestu xeoestratéxicu

El ministru d'Industria y Turismu, Jordi Hereu, refirióse esti martes nel Senáu al bien prometedor futuru industrial d'Asturies. Añedió que vese agora reforzáu pol impulsu de la minería nel Principáu.

«Ye evidente qu'agora tenemos que retomar, con nueves claves de tresformación y nueves tecnoloxíes, un sector que foi, ye y tien que siguir siendo bien importante p'Asturies y pa toa España», comentó Hereu sobre la minería, faciendo alusión a la necesidá qu'esiste agora, énte les necesidaes xeoestratéxiques, de buscar materiales críticos qu'emburrien les cadenes de valor industrial. Hereu respondió na Cámara Alta a una pregunta del senador asturianu del PP José Manuel Rodríguez «Lito» sobre'l futuru de la industria n'Asturies.

El Ministru punxo en valor la capacidá de diálogu qu'esiste n'Asturies y recordó'l recién alcuerdu ente la Federación Asturiana d'Empresarios, CCOO, UXT y el Gobiernu asturianu pa revisar la estratexa industrial asturiana. «Al traviés d'esta fueya de ruta más del impulsu de la inversión del Ministeriu y del Gobiernu d'España que triplica la inversión industrial de los sos gobiernos, el futuru industrial d'Asturies ye bien prometedor pol esfuerzu de tol mundu», respondió al senador del PP.

Sicasí, a José Manuel Rodríguez «Lito» nun-y convencieron les esplicaciones de Hereu. Bona parte de la intervención del senador asturianu refirióse al futuru de la empresa pública Hunosa y a la Sociedá Estatal de Participaciones Industriales, cuestiones de les que Hereu nun faló. «Cáyense-yos los escándalos de corrupción de los bolsos, mientres a Hunosa niéguen-y el futuru, poniendo en riesgu proyectos vitales pa ésti, como la Central de Biomasa de La Pereda, ente otros», criticó'l senador del PP, informa Europa Press.