El profesoráu d'asturianu encadénase frente al Ministeriu d'Educación pa reclamar la especialidá docente

Docentes, families y representantes sindicales y políticos concentráronse güei delantre’l Ministeriu d'Educación, Formación Profesional y Deportes en Madrid nuna movilización histórica convocada pola asociación ADAE (Asociación de Docentes d’Asturianu y Eonaviego/Gallego asturiano) pa esixir la reconocencia de les especialidaes docentes d'asturianu.

L'actu tuvo marcáu por una acción simbólica d'encadenamientu pa denunciar que'l profesoráu lleva décades «encadenáu a la interinidá». Durante la concentración, delles docentes encadenáronse llevando cartelos colos cursos académicos trescurríos dende 1984 —añu d’entamu de la enseñanza de la llingua asturiana— hasta l'actualidá. A midida que se diben lleendo en voz alta, el restu de participantes respondía coriando «ensin especialidá», visibilizando asina más de cuatro décades de precariedá.

Amás de docentes y families, a la movilización asistieron representantes sindicales de CCOO y SUATEA y dellos miembros de la Xunta pola Defensa de la Llingua Asturiana. Tamién s’allegaron representantes políticos de Podemos y FSA-PSOE, amosando l'ampliu respaldu social, sindical ya institucional a esta reivindicación histórica.

La protesta enmárcase nuna selmana clave. La Federación Estatal d'Enseñanza de CCOO rexistró un escritu solicitando una xunta col secretariu d'Estáu d'Educación pa tratar esta situación. Al empar, la conseyera d'Educación del principáu d'Asturies sigue a la espera d'una xunta cola ministra.

Dende ADAE encamentaron al Gobiernu asturianu a cumplir el so compromisu d'aporfiar porque esti alcuentru se celebre aína o, nel so defectu, formalizar una solicitú formal al Ministeriu pa que s’aborde esta situación. «Esta cuestión nun pue siguir allargándose nel tiempu», señalaron. Amás, ADAE rexistró un escritu empobináu a la Ministra d'Educación pa tresmiti-y de primer mano la situación del profesoráu y la so demanda de modificación de los Reales Decretos que regulen les especialidaes docentes.

Anguaño, más de 30.000 estudiantes cursen asturianu y eonaviego en distintes etapes educatives dende Infantil hasta la Escuela Oficial d'Idiomes. Por embargu, la negativa del Ministeriu a modificar los reales decretos que regulen les especialidaes docentes caltién en situación d'interinidá permanente a 332 docentes, magar que cuenten cola formación universitaria necesaria y que desempeñen les mesmes funciones que'l restu del profesoráu.

Dende ADAE insisten en que nun esiste torga llegal pa resolver esta situación. Coles mesmes, alvirtieron de que, si nun se producen meyores nes próximes selmanes, van retomar les movilizaciones n'Asturies.