Mieres programa una Folixa na Primavera de sidra y tradición
Agora
Llan de Cubel, Xose Lois Romero & Aliboria, Dervish y Nando Agüeros son los artistes que van participar nesta edición
02 Apr 2026. Actualizado a las 11:38 h.
La Folixa na Primavera regresa a Mieres los díes 17, 18 y 19 d’abril con una programación completa que se va desenvolver nel Parque Xovellanos y otros espacios del conceyu, combinando conciertos, actividaes culturales, propuestes pa la reciella y una amplia presencia de la tradición sidrera. La cita consolídase asina como unu de los grandes eventos festivos de la primavera n’Asturies.
El vienres 17 entama a les 20.00 hores cola inauguración oficial, con Mercedes Villa, y la entrega del Gallardón Fini Suárez a Pedro Pangua Rivas, amás de los diplomes del cursu d’escanciadores. Tres el pregón y «L’Entamu», a les 21.00 hores arranca’l primer bloque de conciertos con Ruxidera, Prau Llerón, L’Artusu y la Banda Gaites Villa de Mieres. Pela nueche, el cartel completa con Llan de Cubel (23.00) y Xosé Lois Romero & Aliboria (00.30).
El sábadu 18 la programación espárdese a lo llargo del día con actividaes pa tolos públicos: taller infantil Sones y percusiones (12.30-14.00), pasucais de grupos pel centru (13.00), taller de baille asturianu (18.00, Parque Aníbal Vázquez) y el espectáculu de títeres Capiellín colloráu. Tamién destaca la xuntanza de sidres nel Mieres Centru Cultural (18.30-22.00), con preba de variedaes acompañaes de productos gastronómicos. Dende les 20.00 hores, la tarde en danza da pasu a los conciertos con Bandina Los Collaínos y Soi Panderetera, siguíos de Dervish (22.00) y Nando Agüeros (23.30).
El domingu 19 la Folixa caltién el tonu festivu con xuegos tradicionales (12.30-14.00), música de chigre en Plaza Requexu y Cai Jerónimo Ibrán, vermú Folixa Underground cola Güeriata DJ (13.30) y la actuación de la Banda de Música de Mieres (13.00), amás de pasucais.
Mientres tol fin de selmana va haber servicios especiales de buses curuxa y una amplia programación alredor de la sidra, con repartu de vasos, apertura de pipes y escanciáu públicu en distintes franxes horaries, incluyendo opción ensin alcohol, reforzando’l calter participativu y popular del eventu.