La Vuelta a Asturies entama esti xueves la so 68ª edición

La 68ª edición de la Vuelta Ciclista a Asturias yá ta llista pa ponese en marcha. La prueba va arrancer el próximu xueves 23 d’abril con salida oficial dende’l Centru Comercial Los Prados, n’Uviéu, puntu de partida de la primer etapa con final en Benia d’Onís.

Unu de los principales anuncios d’esta edición va ser el regresu de la retresmisión en directo a la Televisión del Principáu d’Asturies (TPA), una midida sofitada pol Executivu autonómicu dientro d’una inversión destinada a la producción televisiva, promoción turística y difusión de la marca Alimentos del Paraísu. La edición de 2026 va cuntar con cuatro etapes, que van amosar la diversidá paisaxística y cultural asturiana, dende les principales ciudaes hasta conceyos rurales, travesando la costa, valles y montes. Un trazáu diseñáu p'amosar el territoriu y reforzar la imaxe d’una comunidá cohesionada y conectada:

Etapa 1 | Uviéu - Benia d’Onís (155,5 km). La primer etapa va xunir Uviéu y Benia, enllazando la capital col interior oriental y l’entornu de los Picos d’Europa.

Etapa 2 | Llanes - La Pola L.lena (140,8 km). La segunda xornada va partir de Llanes y va rematar en La Pola L.lena, pa coneutar el llitoral del oriente coles cuenques mineres y la montaña central.

Etapa 3 | As Figueiras - A Veiga (157,2 km). La tercer etapa va percorrer l’occidente, ente As Figueiras y A Veiga, poniendo en valor conceyos rurales d’altu valor natural y patrimonial venceyaos a la Reserva de la Biosfera del ríu Eo, Ozcos y Terras de Burón.

Etapa 4 | Llugones-Uviéu (152,2 km). La cuarta y última etapa va salir de Llugones y va concluyir n’Uviéu, un percorríu metropolitanu y simbólicu.

El trazáu va percorrer costa, montaña, valles y entornos rurales de tola xeografía asturiana, reforzando’l papel de la prueba como escaparate deportivu y turísticu del Principáu. Asturies yá rueda hacia la so gran cita ciclista.