Álvaro Rivas (Alcalá Norte): «La vida nun son Los Sims»

Alcalá Norte ye una d’eses bandes de les que cada vez fala más xente, pero ensin que se note mui bien en qué momentu pasó. Poco a poco fueron apaeciendo en más sitios, en más conversaciones, y ensin grandes golpes d’efectu acabaron colándose nesi espaciu onde yá nun son promesa, sinón realidá.

Los sos cantares tienen daqué mui directo. Falen de lo cercano, de lo que tienen alredor, y fáenlo ensin demasiaes capes nin artificios. Hai barriu, hai identidá y tamién cierta incomodidá, como si too tuviera contao dende dientro y ensin intención de suavizalo. Quiciabes por eso conecten: porque nun da la sensación de que tán intentando encaxar en nengún sitiu concretu.

Tamién hai una forma mui particular d’entender el momentu nel que tán. Too paez dir más rápido, too esixe más esposición, pero ellos muévense con una naturalidá que descoloca un poco, como si lo importante siguiera tando n’otru llau. El próximu 16 de mayu Alcalá Norte va actuar en Xixón, dientro del Vibra Mahou Fest y, a unos díes del conciertu, falamos con Álvaro Rivas, el cantante de la banda.

— ¿La vida cañón yera pa vosotros lo que tais viviendo dientro de la música?  

— Les xires permiten esfrutar de xenerosos menús del día de carretera en casi tolos puntos d’España. En concretu, una visita a Asturies garantiza un gran avituallamientu en ruta. Comer tan ricamente de menú ye un requisitu pa la vida cañón. D'otra banda, fuimos capaces de garantizanos bon descansu, especialmente ente selmana, cuando nun hai conciertos. Dormir bien, ensin sobresaltos nin visites de los inmortales señores de la nueche, tamién ayuda. Nel mio casu, el mio trabayu permíteme tamién exercitar el mio cuerpu casi como si fuera una xera profesional. Sicasí, otros na banda prefieren la pereza o la cerveza.

— Pa llegar a too esto, pasaron casi siete años dende aquelles versiones de delles bandes y de les quedaes nel centru comercial que vos da nome. ¿Cómo veis el vuesu percorríu en perspectiva? 

— Fuimos bendecíos pola fortuna, que quixo tenenos xirando per España a los cinco años de xuntanos per primer vegada. Nun-y vamos facer ascos a nuevos golpes de suerte, pero pel momentu tamos colocaos nun llugar visible, onde quiciabes la combinación de trabayu duru y arroxu —benditu seya’l nuesu mánager, el más valiente de toos— seya suficiente pa mantenenos a flote. 

— Nun foi, sicasí, hasta l’añu 2024 cuando llanzastis el vuesu primer discu, fai agora xusto dos años. ¿Cómo foi esi procesu?

— Nun lo recuerdo con especial cariñu. Fixímoslo por compromisu con una antigua versión de les nueses persones, qu'en 2019 nun quedríen desaprovechar la oportunidá que’l Doctor Rock nos dio nel branu de 2023. Con too, esi trabayu a caraperru sirvió de muncho, y por poco dinero fiximos un discu que nos fixo visitar yá delles vegaes les Amériques. 

— Agora, en setiembre, va salir lo que va ser el vuesu segundu trabayu d’estudiu. ¿Hai una continuidá ente dambos o veis una rotura clara conforme a la madurez que vos da l’ésitu de la vuesa última xira?

— Esti segundu discu va ser fíu d’una formación compacta, de los mesmos cinco músicos que llevamos dos años xirando per España. Esa ye una gran diferencia respecto al primer discu, qu'axuntaba creaciones de trés o cuatro formaciones diferentes, cosíes poles dotes de producción del Doctor Rock. Polo demás, sigue siendo Barbosa’l que decide si un cantar ye o nun ye Alcalá Norte, si pasa pela peñera y sigue siendo la mesma qu’antes. Los dos discos van poder escuchase conxuntamente ensin sobresaltos. 

— Previu a esi discu, sacastis el single El home planeta, que narra’l negociu del alma de Paganini con Satanás, pero ¿qué más hai detrás d’esa lletra?

— ¡Heinrich Heine! La historia saquéla del so rellatu tituláu Les nueches florentines, traducíu va un sieglu por un anónimu pa Revista de Occidente. La fundación Ortega-Marañón sospecha que foi Manuel Granell el traductor, pero nun hai forma de sabelo. El casu ye que la so prosa yera prácticamente cantable, y tardé mui poco en transformala en cantar. Nun hai rencor pa col nuesu mánager, que ye un hustler, como Yung Beef, pero non Satán nin unu de los suyos. Creo. 

— Lo que ta claro ye que, siendo millennials, faláis de los problemes de la vuesa xeneración y eso yá se vio nel vuesu primer discu. Facéis, en definitiva, una crónica xeneracional.

— Los nuesos cantares falen de la recepción del calvinismu n’Inglaterra, o de la fiebre del cañonéu, tal como la esperimentó Goethe en Valmy. O del esbarrumbe psicolóxicu qu'acompañó l’esfuerzu del pensar de Nietzsche. N’otres ocasiones rimos, con Aristóteles, de les maníes atribuyíes a los llamaos pitagóricos.

Namás n’ocasiones entren vivencies compartíes polos nuesos coetáneos, como les espectatives traicionaes o ciertos manoseos político-mediáticos. Pero ye un gustu que, cuando esto ocurre, resuene nes xentes.

— La vivienda, la precariedá llaboral o la salú mental son dalgunos de los temes que más inflúin neses xeneraciones más moces y que, vosotros, de dalguna manera o otra, tamién vivistis.

— Sí. Mio güela vivió na cai Elfo tola so vida y agora los mios tíos van vender la so keli. Prestábame quedar con ella, pero los vecinos d'al llau ufierten una pasta a la que nun puedo llegar. Y los mios tíos nun tán pa faceme regalos. Ye una pena.

Respecto a la precariedá llaboral: yo yera un privilexáu na oficina, llevantando dos mil y pico netos al mes hasta finales de 2024, cuando decidí dedicame namás a Alcalá Norte. Dos mil y pico pavos al mes en Madrid dan pa vivir solteru nuna ilusión d’abondancia. Sicasí, por alquilar cualquier pisu na conce, el mio barriu, piden la metá de lo que yo ganaba. Si pretendes vivir la to primer madurez a tope, confiando’l tratamientu del to cáncer a que haya güecu na sanidá pública cuando más lo necesites, renunciando a la propiedá del suelu de la axetreada ciudá na que duermes, y renunciando a pagar pañales y material escolar, entós les cuentes pueden salite. La to única preocupación real va ser nun dexar la salú mental en cada porru o en cada raya o en cada copa. Nesto consiste’l privilexu de ganar dos mil y pico pavos en Madrid. Ideolóxicamente, nun fui criáu cola abnegación del capitalista, asina que cualquier otra xestión d’esos dos mil y pico pavos, orientada a la crianza y racionando les Coca Coles, supondría yá una traición a les mios narratives vitales proyectaes. Sicasí, daqué asina ye perfectamente posible. ¡Que-y pregunten a un chinu!

Tragué col cuentu de que falando cinco idiomes y estudiando dos carreres, dándo-y a les mates y a la programación, etc., tendría a los trenta y pocos años dineru suficiente pa mercar un keli y pa pagar el tratamientu del mio cáncer —ensin llistes d’espera— y tamién el del mio fíu. Pero la vida nun son Los Sims. Agora somos empresarios y trato de reeducame financieramente: un grau n’economía nun t’enseña lo que cuesta cocinar unu mesmu la riqueza. Agora’l sueldu que ganaba na oficina paezme hasta un regalu. ¡Pero qué regalu tan poco estimulante!

— Hai tiempu dicíais que «bona suerte al que intente sacar un mensaxe concretu de los nuesos cantares» y, sicasí, too esto de lo que venimos falando ta presente.

— Pue facese una llectura sociolóxica de los mios intereses y les mios elecciones. El Power Ranger verde, los alemanes, l’aforru o’l derroche, los grandes chivos espiatorios. Pero, si vas versu por versu, constátase que nun apunto a nenguna verdá, namás a intentar que les sílabes fluyan lo meyor posible. Neso consiste la mio victoria y tamién la mio derrota. ¡Axallá poder contavos daqué guapo!

— Los trés sois amigos del barriu y lo complicao nos grupos con ésitu siempres foi siguir siendo amigos. ¿Cómo se xestiona too eso col boom de la banda?

— Mui malamente. Juampi salió de la banda va yá más d’un añu, porque la so vida como doctor n’historia económica (fuera d’España, tremendu privilexu tres una década de durísimu y especializáu trabayu) nun yera compatible col emburrión que teníemos ques dar pa tar al altor de lo qu'esperaben los fans y los intermediarios del mercáu de la música. No personal, toi tratando d’asemeyar les mios vivencies de banda a lo que esperimentaba axuntáu colos mios compañeros na oficina. Menos vehemencia, más formalidá. Cuando la xente se xuega’l pan, dexa’l coleguéu de llau y sigue a la xente serio. Una vida más ordenada, menos porros ente selmana. 

— Llegáis nesti 2026 tocando en dos de los festivales de VibraMahou, en Xixón y en Llión. ¿Qué supón pa vosotros esti eventu que tien unos ritmos diferentes a los entendíos como propios d’un festival?

— Meca, nun sabía que nun yera un festival al usu. Vi los nomes del restu de los artistes y paeciéronme dos festivales como cualesquier otru. En cualquier casu, hai daqué de la marca Mahou qu'al Dr Rock pon-y cachondu, y yo dexé contaxame por eso. Amás, páguennos una pasta. Asina que tamos mui concenciaos en dar un gran espectáculu en dambes feches, y asina encarar llenos de confianza’l restu de la xira de branu.

— ¿Vas siguir vistiendo camisetes de fútbol d’equipos «menores» allá onde vaigas nesti nuevu ciclu de la banda? Yá nel pasáu Tsunami Xixón Fest xubisti al escenariu cola del Real Avilés.  

— Siempre Real Avilés Industrial. N’Asturies tamos yá pillaos.