Cultura va facilitar a les entidaes llocales una guía pa la normalización llingüística

La conseyera de Cultura, Política Llingüística y Deporte, Vanessa Gutiérrez, anunció ayeri na xunta de la Rede de Normalización Llingüística en Llaboral Ciudá de la Cultura que’l so departamentu prepara una Guía pa impulsar nel ámbitu municipal la normalización de les llingües propies d’Asturies y pa garantizar los derechos llingüísticos de les sos falantes, que va poner a disposición de los entes locales y de los sos servicios de normalización. Esa Guía va cuntar con información y documentación actualizaes, y formula propuestes d’acciones de promoción del asturianu y del eonaviegu n’ámbitos como l’actividá municipal, el comerciu, la dinamización cultural y l’ociu.

Pa esti 2026, Cultura destina 415.320 euros a la financiación de los mentaos Servicios de Normalización, qu’ufierten sofitu en 36 conceyos, incluyendo asina al 60% de la población asturiano. Amás, la Rede de la que formen parte alredor de 40 conceyos y otres entidaes cunta pela primer vez con un presupuestu propiu de 50.000 euros pal desenvolvimientu d’actividaes complementaries que contribuyan a la normalización efectiva de les llingües propies de la comunidá autónoma, l’asturianu y l’eonaviegu.

De la mesma manera, presentáronse meyores en recursos clave, como l’actualización del Eslema, la versión ameyorada del traductor al asturianu, que va incorporar la selmana próxima, coincidendo cola celebración de la Selmana de les Lletres Asturianes, la función de traducción al eonaviegu. Cultura amplía asina les capacidaes tecnolóxiques disponibles pa dambes llingües. A esti avance súmase la publicación na web institucional de Política Llingüística de los modelos de formularios alministrativos descargables n’asturianu, facilitando’l so usu na xestión diaria de los conceyos.