Mediu Rural destina 10,6 millones pa casi 300 proyectos d'impulsu al empléu nel campu

La Conseyería de Mediu Rural destinó 10,6 millones a los grupos d'acción llocal pa desenvolver casi 300 proyectos d'impulsu al empléu nel campu. El Boletín Oficial del Principáu (BOPA) espublizó esti miércoles la resolución pola que se conceden 10.632.108 euros n'ayudes del programa Leader, que van permitir a los once grupos d'acción llocal d'Asturies desenvolver 298 proyectos pa fomentar l'empléu nel mediu rural.

Estes sovenciones, enmarcaes nel plan estratéxicu de la Política Agraria Común (PAC) 2023-2027, tienen como oxetivu impulsar inversiones en trés árees clave, según destacó Mediu Rural. Trátase de 'Leader Agro', pal fomentu d'inversiones nel sector agrícola; 'Leader Agroindustria', de sofitu a microempreses de la industria agroalimentaria con menos de diez persones en plantiya, y 'Leader Diversificación', con incentivos pa proyectos que promuevan la diversificación económica, más allá de l'agricultura y l'agroindustria.

El programa Leader sofita iniciatives axustaes a les estratexes de desenvolvimientu llocal participativu, un modelu qu'inclúi a los grupos d'acción llocal na toma de decisiones y el repartu de los fondos. N'Asturies operen once grupos, caún con asignaciones específiques. Les sovenciones concédense en réxime de concurrencia competitiva, polo que les empreses beneficiaries recibieron una evaluación que determina la so viabilidá y el so alliniamientu colos oxetivos del programa.

Les ayudes pueden cubrir hasta'l 50% de la inversión sovencionable, con un másimu de 200.000 euros a cada beneficiariu. Les ayudes cunten con un 80% de financiamientu del Fondu Européu Agrariu de Desenvolvimientu Rural (Feader), un 14% con cargu al Principáu y un 6% qu'apurre l'Alministración Xeneral del Estáu.