El Supremu falla per primer vegada sobre la responsabilidá solidaria impropia del cártel de l'automoción
Agora
La Unión de Consumidores d'Asturies valta la estratexa de prescripción de les marques tres de la última doctrina del Tribunal Supremu
15 May 2026. Actualizado a las 13:28 h.
La Sala Primera del Tribunal Supremu dictó la sentencia 1956/2026, na que declara per primer vegada la esistencia de responsabilidá solidaria impropia ente los fabricantes implicaos nel cártel de los vehículos. El fallu, que tien fuerza de xurisprudencia venceyante pa tolos órganos xudiciales españoles, marca un enantes y un dempués na posición procesal de los conductores afectaos y consolida la estratexa litixosa que la Unión de Consumidores d'Asturies lleva desenvolviendo dende 2022.
El cártel de la automoción afectó a toa Europa mientres más de 14 años. Les marques implicaes intercambiaron información comercial sensible de manera coordinada, lo que-yos dexó ampliar artificialmente los precios de venta al públicu. De magar, miles de compradores empecipiaron reclamaciones pa recuperar el sobrepreciu pagu.
La solidaridá impropia ente los cartelistes yá fuera reconocida por diferentes Audiencies Provinciales y pola mesma Audiencia Nacional, pero nenguna d'eses resoluciones tenía la capacidá d'unificar criteriu de forma definitiva hasta agora. La STS 1956/2026 establez una doctrina aplicable a tolos xueces y tribunales del Estáu.
«La sentencia del Supremu confirma lo que veníamos calteniendo énte los tribunales asturianos dende 2022. Agora, nengún xuez pue ignorar que los cartelistes respuenden de manera solidaria. Ye'l momentu d'actuar», señala Dacio Alonso, presidente de Consumidores Asturies.
La solidaridá impropia ye una figura xurídica qu'establez la obligación que tienen dellos causantes d'un dañu de responder conjuntamente énte la víctima cuando nun ye posible saber esactamente cuánto apurrió caún a esi dañu. Nun fái falta que nenguna llei lo diga espresamente nin qu'esista un alcuerdu previu ente ellos; ye el mesmu xuez quien, en sentencia, impón-yos responder como si fueren ún solu.
Calcúlase qu'hasta 140.000 asturianos mercaron el so vehículu mientres los años en que'l cártel tuvo activu y namás un 2% presentó la so reclamación.
La doctrina afitada pol Tribunal Supremu simplifica sustancialmente esi exerciciu. Los afectaos que mercaron vehículos de cualesquier de les marques implicaes disponen agora d'un argumentu xurídicu reforzáu pa reclamar la indemnización íntegra frente al fabricante que resulte más accesible. Toos ellos entá tán en plazu pa exercer acciones llegales. Esto significa que cualquier comprador d'un vehículu nuevu o KM-0 adquiríu ente 2006 y 2013 entá pue reclamar xudicialmente.