Chocolates Plin La Herminia yá tien el catálogu de la so colección documental

Chocolates Plin yá cuenta col catálogu de la so colección documental del Muséu del Pueblu d'Asturies, Yo crecí comiendo chocolate Plin La Herminia. El Muséu del Pueblu d’Asturies edita esti llibru que se dixebra en dos partes. De primeres, Gracia Suárez Botas y Jaime Pire Suárez faen una repasada a la historia d'esta empresa, dende la cercanía, como fía y nietu de Juan Suárez, propietariu de La Herminia. De segundes, inclúyese'l catálogu de tolos documentos d'esta empresa xixonesa que se caltienen nel Muséu del Pueblu d’Asturies, estremaos en cuatro apartaos: la fábrica, la comercialización de productos, la publicidá y el coleccionismu.

La Herminia naz en 1885 de la mano de Herminio Fernández na cai Menéndez Valdés (Xixón). Más tarde, ye Tomás Pañeda quien toma les riendes de la empresa treslladándose a l'Avenida de Portugal. Ye en 1940 cuando Juan Suárez Martínez merca la empresa, siendo'l so propietariu mientres mediu sieglu.

En 1973, Juan Suárez compra una parcela nel polígonu de Porceyo y en 1978 inaugúrase la nueva fábrica, empezando una etapa d'espansión qu'empieza cola compra de marques como Chobil (Chocolates Bilbainos) o El Mago (Llión), y la fabricación d'una marca blanca pa supermercaos. Esta ye una dómina de rellumanza.

Suárez va dexar la dirección de la empresa en 1990. Dempués, La Herminia pasó a formar parte del Grupu La Fosforera y, más tarde, al Grupu Trapa, qu'en 2004 cierra les instalaciones de Porceyo y treslládase a Palencia. Esta fábrica va pasar a la empresa Europraliné, que sigue fabricando esta marca na actualidá.

El chocolate llegó a España nel sieglu XVI y fueron les ordes relixoses les que lu estendieron per tola Península. Magar nun empiezu yera consideráu un alimentu de lluxu, a empiezos del sieglu XX, el so consumu xeneralizóse, gracies al aumentu de la producción de cacáu, la mecanización y la publicidá. N'Asturies, a mediaos del sieglu XVIII había ventinueve chicolateros, a principios del sieglu XX son setenta les fábriques esistentes, y nos años 30, la so dómina de rellumanza, esti númberu amplíase a cien fábriques de chocolate. Esti númberu caltiénse hasta la década de los 60 cuando empieza una lenta desapaición de la industria chicolatera asturiana.

Na actualidá, son los museos y los coleccionistes los que caltienen la historia del chocolate n'Asturies. Nel 2015, el Muséu del Pueblu d’Asturies realizó la esposición Chocolate y publicidá n'Asturies, xuntu al catálogu del mesmu títulu y l'estudiu sobre les fábriques de chocolate n'Asturies, de Claudia Prieto Rodríguez. Agora, esta publicación sobre la fábrica de chocolates La Herminia sigue completando los estudios sobre esti productu, tan importante na cultura y la historia asturiana.