La banda asturiana La Tarrancha vuelve con un tema nuevu
Agora
El nuevu cantar titúlase L'alcordanza encesa y ta dedicáu a la xente que falta; un tema emotivu y baillable al tiempu como ye la costume del grupu y que cunta con un videoclip mui especial
10 Jun 2026. Actualizado a las 20:27 h.
La banda asturiana La Tarrancha vuelve con un tema nuevu. El nuevu cantar titúlase L'alcordanza encesa y ta dedicáu a la xente que falta; un tema emotivu y baillable al tiempu como ye la costume del grupu y que cunta con un videoclip mui especial.
La banda asturiana de mecigayu ska La Tarrancha vuelve a allegrar a les sos incondicionales con un cantar nuevu dos años depués del so últimu trabayu discográficu. Hai que puntualizar que la banda vuelve al estudiu, porque de los escenarios nun baxó enxamás nestos más de venti años de carrera musical que lleva la mítica formación a la espalda.
El tema nuevu L'alcordanza encesa ye un cantar de corte especialmente emotivu que ta dedicáu a toes eses persones que falten, les que yá nun tán y echamos de ver. Un sentir tan humanu como l'amor, que La Tarrancha llogra facer baillable al traviés de la so fórmula única que mez sentimientu y dinamismu, cellebración y llucha. Pal videoclip, decidieron cuntar col so públicu más cercanu pa incluyir semeyes de persones queríes que yá nun tán. Un homenaxe tan sentíu como necesariu, na llinia de la banda, que nun tien problema en poner el focu na atención pa la salú mental ente otros temes recurrentes nes sos lletres, siempres marcaes por un calter reivindicativu que nun arrenuncia a la comedia. Ente les persones homenaxaes nel videu inclúinse personalidaes tan apreciaes dientro de la cultura asturiana como'l poeta Xuan Bello, el divulgador y periodista Damián Barreiro, l'artesana y divulgadora Rosa Cunqueira, l'ornitólogu y multiinstrumentista Elías García o la política y activista Yolanda Huergo.
El tema ta grabáu en TUTU Estudios de Corvera con Sergio Rodríguez al cargu de la producción y el videoclip que lu acompaña cuerre al cargu de la realizadora sierense Leti Cienfuegos. Otru detalle de novedá ye la sustitución del batería, nun movimientu que nun supón una novedá, sinón más bien un cambéu d'orde: el batería suplente Dani Valdés pasa a ser titular pa dexa-y la suplencia al anterior titular, Edu Llosa. Y ye qu'esta banda tien, ente otres pecularidaes, la de cuntar con un equipu bien nutríu de músicos amigos al rodiu de la formación principal que-yos permite conciliar les axendes, ritmos de vida y compromisos de tolos sos integrantes. La formación principal quedaría entós asina: Delfín Valdés (voz y flautes), Fabián Díez (Trombón), Dani Valdés (batería), Juan Bertrand (guitarra), Andrea Lobo (curdión), Xavi (baxu) y Mónica Vega (multipercusionista)
El públicu de La Tarrancha, ún de los más fieles del panorama musical asturianu, ta de norabona non sólo pol llanzamientu de L'alcordanza encesa, sinon porque la banda confirmó que ta preparando tamién un nuevu tema en collaboración col raperu xixonés Mostru L'Horru. En pallabres del so cantante Delfín Valdés «preparáivos porque si L'alcordanza ye guapo, lo prósimo va ser un temazu». Anque tovía nun hai fecha de llanzamientu confirmada, la espera pol tema nuevu faise menos dura sabiendo qu'hai tres cites pa esfrutar de La Tarrancha en directo mientres el branu: Zarréu Fest (3,4 y 5 de xunetu en Degaña) y Fiestes Populares de Ciares (25 al 28 de xunetu nel barriu xixonés) y La Carriona Rock (13 de setiembre n'Avilés).