El festival VESU confirma los horarios de la so séptima edición n'Uviéu y Güeñu

El festival VESU llega yá a la so séptima edición, que va celebrase los díes 26, 27 y 28 de xunu d'esti 2026. La organización de la cita musical dio a conocer de manera oficial los horarios completos y los escenarios onde van tener llugar toles actuaciones programaes, que cunten col patrociniu de la Fundación Municipal de Cultura del Conceyu d'Uviéu y del Conceyu de La Ribera. Nesti sen, el festival llogra recuperar la capital asturiana como l'epicentru principal de la so actividá, distribuyendo los sos conciertos en dos llocalizaciones distintes.

D'una banda, los conciertos del vienres y del sábadu van facese nel Espaciu FMC, asitiáu n'El Campillín, concretamente dientro del recintu de la Fundación Educativa Santo Domingo - Dominicos n'Uviéu, un espaciu declaráu Bien d'Interés Cultural que la organización quier poner en valor. D'otra, la xornada de piesllu del domingu va treslladase a la Central Artística de Güeñu, asitiada nel conceyu de La Ribera.

Programación por díes y horarios

La xornada inaugural del vienres 26 de xunu va desenvolvese de manera íntegra nel Escenariu Vibra Mahou del Espaciu FMC n'Uviéu. La música va empezar a sonar a les 19:30 hores cola banda Sobrezero. Darréu, a les 20:40 hores, va ser la vez de Dora Band, que va ufiertar nesti eventu'l so únicu conciertu en festivales mientres esti branu. Snake Eyes va xubir al escenariu a les 22:15 hores, mientres que la formación Mujeres va pesllar les actuaciones en directo a les 23:50 hores. Pa completar la Nueche, la DJ xixonesa Lucía Dilema va tar al cargu de los amiestos musicales.

El sábadu 27 de xunu, l'actividá va siguir nel mesmu recintu d'Uviéu con una programación repartida ente la sesión de mañana y la de tarde. Las Petunias van abrir el día a les 13:00 hores, siguíes polos gaditanos DenisDenis a les 14:25 hores. Tres d'un descansu, la tarde va empezar a les 19:00 hores col Conciertu Vibra Mahou de La Sonrisa de Julia. Darréu, van actuar Depresión Sonora a les 20:35 hores y los asturianos Puño Dragón a les 22:20 hores. El zarru de los conciertos de la xornada va correr a cargu de María Arnal a les 00:10 hores, nun día nel que Mediocre va ser el DJ oficial encargáu de la cabina.

El domingu 28 de xunu, el festival va treslladase a la Central Artística de Güeñu col patrociniu del Conceyu de La Ribera. Esta última xornada ta plantegada como una fiesta familiar que va empezar a les 13:00 hores cola actuación de Begut. A les 14:15 hores va tomar el relevu Billy Boom Band cola so puesta n'escena. El DJ Diskreepo va poner el puntu final de la música nel festival.

Precios y venta d'entraes

Les llocalidaes pa poder asistir al festival yá tán disponibles al traviés de la canal oficial de venta na páxina web www.vesuoviedo.com Los usuarios puen optar por mercar entraes de día o bien l'abonu completu pal festival. Los precios marcaos pola organización son los siguientes:

• Vienres 26 de xunu: 30 € más gastos de xestión.
• Sábadu 27 de xunu: 45 € más gastos de xestión.
• Domingu 28 de xunu (vermú): Entrada única de 5 €.
• Abonu completu: 60 € más gastos de xestión.