El Clapton CFC va visitar Asturies el 4 de xunetu con una doble xornada frente al UC Ceares y el CF Llosalín

El fútbol popular va vivir una cita internacional n'Asturies el próximu 4 de xunetu cola visita del Clapton Community Football Club (CFC), conxuntu londinense reconocíu pol so modelu de xestión comunitaria y el so compromisu social. L'equipu inglés va apostar una doble xornada de partíos amistosos en Xixón, enfrentándose al Unión Club Ceares en categoría masculina y al Club de Fútbol Llosalín na modalidá femenina.

La xornada va celebrase nel campu de La Cruz, en Ciares, onde dambos alcuentros se van xugar de forma consecutiva. El partíu femenín va abrir el programa col enfrentamientu ente'l CF Llosalín y el Clapton CFC,mientres que darréu va tener llugar el duelu ente l'UC Ceares y el primer equipu masculín del conxuntu londinense.

Esta visita forma parte de la xira braniega del Clapton CFC, que suma asina una nueva parada internacional dientro d'una trayectoria marcada polos sos viaxes a diferentes ciudaes europees. El club británicu, fundáu nel 2018 por aficionaos, consolidóse como un referente del fútbol autoxestionáu, con un modelu 100% propiedá de los sos socios y un fuerte allugamientu en causes sociales y antifascistes.

L'UC Ceares, pela so parte, representa ún de los proyectos más emblemáticos del fútbol popular nel Estáu. Dende la so tresformación en club xestionáu polos sos socios, la entidá xixonesa impulsó un modelu participativu y asambleariu, convirtiendo'l fútbol nuna ferramienta de tresformación social y cultural nel barriu.

Nel ámbitu femenín, el CF Llosalín va ser el rival del Clapton CFC nun alcuentru que tamién reflexa la conexón ente proyectos comprometíos col deporte de base. El club asturianu, con sede en La Ribera cuenta con más de dos décades de trayectoria y un fuerte venceyu col desenvolvimientu del deporte femenín n'Asturies.

Más allá de lo deportivo, l'eventu plantégase como una xornada de convivencia ente aficiones, con un ambiente festivu nel que la música, la cultura y la reivindicación social van tener tamién protagonismu. El campu La Cruz, habitual escenariu d'actividaes culturales entamaes pol UC Ceares, va ser l'epicentru d'un alcuentru qu'aspira a reforzar los llazos ente diferentes comunidaes futboleres.