Voblanaes, el nuevu proyectu de Voces Blancas del Nalón, llanza un crowdfounding pa llevar el so nuevu trabayu de música asturiana a la capital europea de la música

L'agrupación xuvenil del proyectu coral Voces Blancas del Nalón empecipió nel 2024 lo qu'agora ye un proyectu musical, visual y collaborativu ente artes y artistes. La propuesta axunta cantares tradicionales asturianos que pasaron de xeneración en xeneración. Melodíes del ayeri y cantares de músicos actuales del panorama asturianu tresformaes n'arreglos corales llevaos a la so forma de tresmitir la música.

Voblanaes va más allá de la propuesta musical. El trabayu collaborativu ente los sos componentes trespasa la sala d'ensayu y tiende una ponte d'unión ente les sos voces y les d'otros. Cantantes, compositores y arreglistes como son Vero Rubio, Susana Sors, Javier Blanco, Héctor Braga, Muyeres, Guieldu y Fernando Valle Roso formen tamién parte d'esti entramáu. Coles mesmes, la ilustración asturiana xúnese al proyectu, con diez ilustradores que collaboren con él. Isabel Muñoz, Istrice Ilustra, Sergio Dosal, Hugo Priede, Celia Pandiella, Mario Hidalgo, María Ortiz, Nievesita, Bruno Galán y Alfonso Zapico son les manes que ponen color a munches de los pagos de la campaña de micromecenazgo de Voblanaes. A estos nomes van dir sumándose-y otros a lo llargo del procesu, como Ringo Rango, encargada de poner l'enllaz visual al grupu col so vestuariu o Díaz Faes que va facer una intervención artística en directo.

El crowdfounding va facese al traviés de la plataforma Goteo.org, onde toles aportaciones -de les que'l comprador va poder esgravar un porcentaxe- van ser l'ayuda pa, nun principiu, el viaxe a Viena, l'oxetivu principal de la recaldación. Pero la so ilusión ye algamar muncho más. El próximu payares, Voblanaes va cruciar fronteres p'actuar nel 12th International festival of choirs and orchestras in Vienna (Austria), llevando la música asturiana y la Cuenca del Nalón a percorrer el mundu. La recaldación al traviés del crowdfounding consta de dos fases: la primera y crítica, de 40 díes, na que tienen qu'algamar la primer llende pa sufragar la mayoría de los gastos que supón el viaxe. Si esto nun ye asina, el contador pónse a cero. Y una segunda, d'otros 40 díes, onde toa recaldación extra va ayudalos a cubrir gastos añedíos y a crear l'eventu de los sos suaños.

Y ye que'l próximu 19 de setiembre van debutar nel templu actual de la música y tradición asturiana y l'asociacionismu. La Benéfica (Piloña) va acoyer a Voblanaes ente les sos parés llenes d'historia y van convertir ellí'l so proyectu nun finxu más na trayectoria de Voces Blancas del Nalón. L'eventu va tar enllenu de sorpreses, tanto sonores como visuales, que van facer del espectáculu daqué que recordar dientro de munchu tiempu. Les aportaciones del crowdfunding van ser fundamentales pa poder llevar a cabu les idees qu'esti llugar y esti repertoriu inspiren a l'agrupación.

Voblanaes quier que la so propuesta tresforme y seya engranaxe nel motor de cambéu. Pa eso busquen collaboración y asistencia, non yá económica. Busquen convidar pa que s'esfrute del so trabayu y formar parte del procesu.