Asturies Antitaurina va celebrar el Día Mundial Antitaurinu en Les Lletrones de Xixón

L'Asociación Asturies Antitaurina va concentrase esti xueves a les 19:30h nes Letronas de Xixón pa rindir homenaxe a la llucha antitaurina; una llucha pola xusticia, la empatía y el respetu a los animales. «Xixón ye antitaurinu y eso precisamente queremos reivindicar. La mayor parte de la sociedá asturiana ta en contra de les corríes de toros, per enriba de que dellos políticos nos quieran vender otra cosa o los medios de comunicación dediquen páxines y páxines a la tauromaquia. El 77% de los españoles refugamos esta cruel tradición», esplica Medea López, presidenta de l'asociación.

«Cada mes d'agostu, tien llugar en Xixón una de les manifestaciones antitaurines más numberoses del estáu. Magar de que muncha xente ta de vacaciones, más de mil persones movilizámonos polos derechos d'otros, de los animales, y eso tien entá más méritu», recuerda.

«Nenguna tradición xustifica la violencia. Nin por motivos económicos nin ideolóxicos un estáu civilizáu tien que permitir la tortura pública d'un animal al que se somete a una auténtica agonía enantes de da-y muerte. Pero ye que la tauromaquia nin siquier xenera grandes beneficios. Si asina fuera, ¿por qué cada vez recibe más subvenciones millonaries de les comunidaes autónomes pa promocionala? Ensin subvenciones, nun son nada», afirma Susana Lopez, la vocera.

«Esa ye otra de les munches mentires de los taurinos. Tamién dicen, en contra de toa evidencia científica, que'l toru nun sufre o que nun ye una práctica violenta. A cencielles con tener güeyos na cara esti argumentu desmóntase. El toru carez un gran sufrimientu enantes, mientres y, n'ocasiones, dempués de la corrida, cuando entá sigue con vida. Dende Asturies Antitaurina siguimos insistiendo na necesidá d'alloñar a los menores de la violencia de la tauromaquia y esperamos que bien llueu s'apruebe na Xunta la reforma pa prohibir l'accesu de menores a los espectáculos taurinos», indica.