El Muséu Etnográficu de Grandas de Salime «Pepe el Ferreiro» amplía la so programación pa esti branu

El Muséu Etnográficu de Grandas de Salime «Pepe el Ferreiro» entama la temporada de branu con un incrementu notable de les sos actividaes d'enseñu y divulgación cultural. A lo llargo de los meses de branu, el centru museísticu va disponer d’una axenda enllena de visites guiaes temátiques, amueses d’oficios tradicionales en directo y dellos eventos especiales coordinaos cola Asociación d’Amigos del Muséu. Esti espaciu cultural ta xestionáu de mou directu pola Sociedá Pública de Xestión y Promoción Turística y Cultural del Principáu d’Asturies, un organismu dependiente de la Conseyería de Cultura, Política Llingüística y Deporte.

Mientres los meses de xunetu y agostu, les persones que visiten el muséu van tener la oportunidá de conocer en fondura los secretos de la vida nel campu asturianu. De martes a domingu van realizase visites guiaes al molín hidráulicu, onde se va amosar el so funcionamientu internu y se va desplicar la importancia fundamental que la molienda tenía na economía de la sociedá llabradora tradicional.

Los miércoles van dedicase de forma esclusiva a percorrer los graneros del muséu. Nesta actividá va afondase nel usu y les característiques d’elementos muebles tan constitutivos del paisaxe asturianu como son los horros, les paneres y los cabazos. Pela so parte, los vienres van ufiertase percorríos guiaos xenerales pol Muséu, con itinerarios detallaos que van dexar a los participantes pescudar en tolos espacios y colecciones del equipamientu.

Amueses en vivo d’oficios tradicionales

La recuperación y exhibición de los saberes antiguos va ser otru de los pilares del branu. El próximu 11 de xunetu, l’artesana Mª Paz González Mesa va amosar al públicu les xeres del procesáu de la llana y les técniques de texeduría tradicional que d’antiguo se facíen dientro de les cases llabradores.

El protagonismu de la forxa y de la madera va llegar de la mano d’Arturo Iglesias, el «torneiru» oficial del muséu. Iglesias va realizar amueses de forxa los miércoles y vienres dende’l 15 de xunetu hasta’l 11 de setiembre. Coles mesmes, los martes y xueves, ente’l 16 de xunetu y el 10 de setiembre, va poner en funcionamientu’l tornu de media vuelta, una pieza clave de l’artesanía llocal. A esti calendariu súmase’l cesteru Sergio Federico Hache, que los díes 25 de xunetu y 29 d’agostu va dar a conocer los procesos de trabayu de la cestería tradicional, un oficiu perimportante pal desendolque de les xeres agrícoles y doméstiques na sociedá tradicional.

L’Asociación d’Amigos del Muséu va collaborar tamién na organización de dos cites bien significatives. El sábadu 8 d’agostu, los miembros d’esta entidá van recrear dellos ambientes, oficios artesanales y llabores cotidianos de la vida nel campu, apaeciendo caracterizaos con ropes de la dómina pa llograr un mayor realismu. Más tarde, el 12 de setiembre, la bodega del muséu va acoyer una xornada d’ellaboración tradicional de vinu.

Pa rematar la ufierta cultural, el recintu va cuntar con xuegos tradicionales nos sos esteriores y va caltener abiertes al públicu dos esposiciones temporales: el proyectu fotográficu documental d’Analía Pello tituláu «En el umbral del olvido», centráu n’oficios asturianos en peligru d’estinción, y les obres finalistes del «V Maratón fotográficoGrandas en mi objetivo», qu'amuesen distintes perspectives del patrimoniu xeográficu y humanu de Grandas.