Congresu européu de llingües amenazaes

N´Uviéu, del 24 al 26 de xunetu, va cellebrase´l XXVIII Congresu de l´Asociación poles Llingües y Cultures Europees Amenazaes (ALCEM) nel Muséu Arqueolóxicu d´Asturies. Baxo’llema «En Avant pour nos langues!» (Alantre polos nuesos idiomes) van xuntase especialistes comprometíos pola sobrevivencia de les llingües minorizaes d’Europa. El so primer congresu foi en 1965. Ye la segunda vegada que se fai nel nuesu país dende 1987.

La inauguración va facese na Xunta Xeneral na mañana del día 24 de xunetu. La programación calcará na situación de caltenimientu, na tresmisión xeneracional y la lliteratura nestos idiomes, asina como na so revitalización y les polítiques llingüístiques.Participarán representantes del bretón, l’occitanu, el corsu, el galés, l’irlandés, el gaélicu escocés, el sardu, l’aragonés, el friulanu, l’asturianu, etc.

Ye vezu que se faigan los congresos coles llingües más prósimes al llugar onde se faen. Poro hai representantes de comunidaes llingüístiques de Francia, Italia, Eslovenia, Irlanda, Bélxica y España, ente otros. Amás habrá un recital poéticu previu de Mario Obrero’l día 23 y un viaxe final a Cangues d’Onís, aniciu del Reinu d’Asturies.

Los finxos cimeros d’ALCEM son:

—Que toa llingua merez respetu, Defendeles ye parte de l’aición polos Drechos Humanos.

—Les llingües son patrimoniu cultural fráxil, porque yá mui febles, nun puen ser restauraes.

—La defensa de les llingües en peligru ha ser una espresión de moralidá positiva.

El desendolcu n’Asturies d’esti congresu tien de sirvir como un envís pal refuerciu del llamáu a la normalización y la oficialidá, nunos momentos especialmente delicaos pal caltenimientu l’idioma minorizáu. Ello nuna Europa na que fai falta una defensa con puxu énte la globalización y la perda de drechos na práutica diaria de los falantes d’idiomes minorizaos. La pluralidá llingüística y la democracia cultural tán en xuegu na nuesa sociedá. Asina como la capacidá de los pueblos europeos pa la continuidá vital y la creación nes sos llingües minorizaes.