Los trabayadores de les corresponsalías de la RTPA convoquen seis xornaes de fuelga en xunetu

Los trabayadores del serviciu de corresponsalías de la Radiotelevisión del Principáu d'Asturies (RTPA) alcordaron n'asamblea convocar seis xornaes de fuelga pa los díes 11, 12, 13, 18, 19 y 20 de xunetu en protesta pola falta de meyores na negociación cola empresa axudicataria del serviciu.

Según informaron esti xueves nun comunicáu, la decisión llega dempués de numberosos intentos de entablar una negociación cola empresa qu'empresta anguaño'l serviciu, Servicios Audiovisuales Overon, qu'asumió la contrata'l pasáu 18 de mayu, y enantes con Videoreport, dambes filiales del Grupu Mediapro.

Los trabayadores aseguraron que mientres los últimos años amosaron la so disposición a algamar alcuerdos, llegando inclusive a arrenunciar a parte de los atrasos derivaos de l'actualización del conveniu y a asumir condiciones llaborales que, según indicaron, nun yeren les aparentes o nun s'afacíen a conveniu, coles mires de garantizar la continuidá del serviciu y de les socesives contrates.

Coles mesmes, recordaron que va unos meses denunciaron públicamente les sos condiciones económiques y llaborales y afirmen qu'agora dan un pasu más énte l'ausencia de meyores y un muriu d'escuses que, al so xuiciu, torga atender les sos reivindicaciones.

Los profesionales destacaron que lleven dos décades emprestando esti serviciu, comprometíos col serviciu públicu y vertebrando'l territoriu, y aseguren qu'el so oxetivu ye poder desenvolver el so trabayu en condiciones dignes. «Tres de meses y meses d'escuses los trabayadores decidimos dicir basta», conclúin.