El primer estudiu de la Cátedra Universitaria de Demografía revela que la perda de población ye la segunda esmolición de los asturianos namás per detrás de la vivienda

La Universidá d'Uviéu presentó güei los resultaos de ASTURDEMO25, el primer trabayu de la Cátedra de Demografía, que revela que'l retu demográficu asítiase ente les grandes esmoliciones de la ciudadanía d'Asturies. La encuesta confirma que, cuando s'agrupen tolos fenómenos vinculaos a la demografía —avieyamientu, baxa natalidá, despoblación y emigración xuvenil—, el so pesu acumuláu na axenda ciudadana iguala al de la vivienda, qu'apaez como primer esmolición, y supera con claridá al desemplegu. Tamién revela la percepción favorable que se tien del fenómenu de la inmigración.

El director de la Cátedra de Demografía de la Universidá d'Uviéu, Óscar Rodríguez Buznego, presentó los principales resultaos acompañáu pola directora d'área de Cátedres d'Empresa y Institucionales, Verónica Cañal, y pol director xeneral de Retu Demográficu, Marcos Niño. Buznego esplicó que ASTURDEMO25 naz pa cubrir una falta relevante: «Suple la falta de datos oxetivos, sólidos y representativos, apurre conocencia sobre la opinión y les actitúes de los asturianos y amuesa la complexidá del retu demográficu».

Esti estudiu sistematiza la información llograda nuna encuesta realizada a una amuesa de 800 persones, mayores de 16 años, con un marxe d'erru de ±3,5%. Les entrevistes lleváronse a cabu de manera telefónica, ente'l 15 d'avientu del 2025 y el 15 de xineru del 2026, con un equilibriu territorial ente'l centru, oriente y occidente y un cuestionariu zarráu ellaboráu específicamente pa esti trabayu. Esta investigación confirma que'l conceptu de «retu demográficu» tien una notoriedá casi universal n'Asturies: el 90,4% de la población conozla y los asturianos percíbenlu como un problema grave o mui grave. Amás, el 45,7% considera que la situación na comunidá autónoma ye más grave que n'otros territorios. El trabayu alvierte de qu'esa conciencia demográfica ye amplia, pero entá intuitiva. La ciudadanía identifica los síntomes más visibles, como los pueblos que se vacíen, la mocedá que cola o los servicios que se pierden.

Los resultaos señalen tamién que les diferencies de percepción esplíquense principalmente pola afinidá política, la zona de residencia y la edá. Dende'l puntu de vista territorial, la población del occidente y, en menor midida, la del oriente amuesa una mayor sensibilidá pa colos problemes demográficos. La esplicación anicia en que probablemente vive esta situación de forma más cotidiana y directa. Por edaes, la mocedá n'edá reproductiva son los qu'amuesen una menor esmolición pola cayida de la natalidá, mientres que los mayores de 64 años perciben esti fenómenu con mayor gravedá.